本週反思#227💬

「禱告求問，為什麼❓」

為了跟我的主多溝通、多認識。

……

15/03/2022（二）21:00 Zoom

合唱團

副校長找來學長為暑假音樂劇配器，並邀請學長阿Tim分享配器心得。

副校長說：「好唔好聽？」

同學紛紛說：「好聽。」

副校長說：「好，聽完啦，有冇問題想問？」

我打開zoom的咪。

我說：「我有嘢想問。」

副校長說：「問啦。」

我說：「阿Tim編得好好聽，嗰總譜有冇得賣？」

副校長說：「吓，嗰總譜，頭先咪share screen show咗俾你哋睇囉。」

我說：「嗰幾首音樂，一陣間就播完，嗰螢幕又細，我未睇得清楚就第二首啦！」

副校長說：「係咁呀？」

我說：「我想買嗰總譜，慢慢番屋企研究一下點樣可以編得咁好聽。」

副校長說：「呢個唔係你話買就買，喺學校commission我哋嘅畢業生阿Tim編嗰播。」

我說：「知道，你考慮吓，學校肯賣，我即買。」

副校長說：「考慮吓先啦，仲有冇其他問題？」

同學肅靜。

副校長說：「冇啦嘛？好，落堂。」

……

10/05/2022（二）18:50 香港國際音樂學校小食部

我正在趕吃晚飯，準備七時正的合唱團練習。正當我夾起椒鹽豬扒之際，副校長經過，前往電梯。

我說：「副校長。」

副校長說：「啱啦，有嘢俾你。」

我說：「有嘢俾我？」

副校長說：「係呀。」

我說：「咩黎？」

副校長說：「總譜。」

我說：「嘩，正，多謝晒。」

……

另一個我說：「嘩，主有冇攪錯？」

我說：「主無嘢會攪錯。」

另一個我說：「主明明話我哋求魚，佢只係會賜好東西架咋喎。」

我說：「總譜，對於我呢個作曲文憑嘅一年級生黎講，咪就係非常好嘅好東西囉。」

另一個我說：「而家嗰問題係，你求魚得魚，求總譜得總譜呀！」

我說：「咁有咩問題？主冇講過求魚唔可以得魚。」

另一個我說：「我好耐冇求問過主啦！」

我說：「點解呀？」

另一個我說：「主有主權架嘛，佢話晒事，我有say咩？」

我說：「想講咩呀？唔好喺度同我遊花園，直接啲！」

另一個我說：「我求魚，主九成九都唔俾魚我架啦，咁我咪索性唔求，主俾乜咪要乜囉，慳番啖氣。」

我說：「哦，主唔應你所求，你就消極當順服。」

另一個我說：「我冇消極，主俾乜我都甘心樂意接受嘅。我只係信得耐，累積咗啲經驗，禱告嗰陣有啲技巧咁啫。」

我說：「慳啲啦！咁甘心樂意接受嘅，你一開波又話主有冇攪錯？」

另一個我說：「咁係呀嘛，你求總譜，主就真係叫副校俾嗰總譜你喎。」

我說：「主冇講過，求總譜唔俾總譜，求魚唔俾魚。」

另一個我說：「如果主唔俾總譜你，我睇你仲求唔求？」

我說：「乜喺我求總譜之前，你有聽到主話要俾總譜我咩？」

另一個我說：「我冇聽過……唔知主俾唔俾，咁你仲問？」

我說：「就係問咗先知主俾唔俾。」

另一個我說：「喂，你好多嘢唔知嗰喎。咁咪成日問？」

我說：「係成日問呀，我仲要事無大小，乜嘢都問，一諗到就問。」

另一個我說：「咁問法？煩唔煩呀你？」

我說：「佢係我嘅主黎架，有關係架，仲要喺最親嗰個，唔係喺街邊唔知喺邊條巷嗰度撞到嗰啲三唔識七。我有嘢想知就問，有嘢想要就求。」

另一個我說：「三十幾歲扮細路，知唔知醜呀你？」

我說：「醜咩呀？你祈禱嗰陣唔係話主係爸爸黎嘅咩？仔問老豆，好正常架咋，唔問先怪。」

另一個我說：「你以為自己仲係初信呀？你09年決志，12年領洗，信咗成10年有多架啦。咁問法，毫無節制，知唔知主有主權？」

我說：「我問吓求吓咋喎，冇講一定要架，主聽完之後，完全有權應承我，有權拒絕我。」

另一個我說：「問完求完一大輪，主最終都係拒絕你嘅，你到時咪樣衰兼嘥氣囉！」

我說：「哦….巴閉啦！怕樣衰，唔拒絕得嘅。主拒絕過你，你就以後都唔再開口向主求問啦？仲要嫌嘥氣，係咪即係開親口求問，都一定要主直接應允你呀？」

另一個我說：「開親口求問唔係為主直接應允，仲可以為咩呀？」

我說：「為咗同主溝通多啲，認識多啲囉。」