本週反思#221💬

「馬死，害怕嗎❓」

怕，但若願意落地跟隨主，仍可前行。

……

26/03/2020（六）14:00 家

學生說：「葉sir。」

我說：「喺。」

學生說：「有嗰apps，想俾你睇吓。」

我說：「哦。」

學生說：「呢嗰app自學英文嘅。」

我說：「唔。」

學生說：「呢度日日都有新嘅英文文章出架。」

我說：「唔。」

學生說：「又有字詞文法解說。」

我說：「唔。」

學生說：「仲有人讀俾你聽添。」

我說：「唔。」

學生說：「嗰app係咪好犀利？」

我說：「係呀。」

學生說：「我影副相俾你，你都可以download嚟用下。」

我說：「多謝。」

學生離開。

…….

另一個我說：「你學生終於走咗啦。」

我說：「做咩？你驚呀？」

另一個我說：「你點知架？我都冇同你講話我驚！」

我說：「你有乜我唔知架？啱啱諗咩呀？講嚟聽吓。」

另一個我說：「我諗…嗰app好叻咩。」

我說：「嗰app真係好叻，叻到你驚。」

另一個我說：「我有咩要驚？」

我說：「驚嗰app叻過你，你冇得撈囉。」

另一個我說：「冇得撈有咩好驚？」

我說：「驚冇錢囉，冇錢咪好多嘢都做唔到，咁仲唔夠得人驚呀？」

另一個我說：「好得人驚。」

我說：「不過你又唔駛唔驚。」

另一個我說：「玩嘢呀，嗰頭嚇到我半死，嚟頭又叫我唔駛咁驚？」

我說：「咁驚做咩啫？東家唔打咪打西家囉。」

另一個我說：「嗰app咁叻，我邊度都冇得教英文架啦。」

我說：「咁咪攪音樂囉，你而家學緊架。」

另一個我說：「啱啱開始學咗年幾咋，十劃都未有一撇，仲日日燒緊銀紙，冇得撈連音樂都冇得學呀，唔驚！」

我說：「咁去做護理員咪得囉，而家咁多空缺，肯做實有。」

另一個我說：「護理員？你知唔知護理員返幾多嗰鐘搵幾多錢？」

我說：「怕時薪低呀？」

另一個我說：「你知唔知一個護理員要照顧幾多個院友？仲有，你究竟知唔知護理員要做啲乜？」

我說：「怕辛苦呀？」

另一個我說：「我大學講師嚟架，你叫我做護理員？」

我說：「怕冇面呀？」

另一個我說：「總之唔得啦。」

我說：「馬死落地行，冇晒錢嗰陣就唔得都要得。」

另一個我說：「唉。」

我說：「其實你咁驚做乜啫？」

另一個我說：「你試吓冇咗份工呀？」

我說：「冇咗份工，你又唔係未試過，讀音樂之前，你咪冇咗浸大份十年嘅教職囉。」

另一個我說：「你試吓失業呀？」

我說：「失業，你又唔係未試過，你教院一畢業，就失業啦，喺屋企張床度足足攤咗一年。」

另一個我說：「你試吓冇晒啲積蓄呀？」

我說：「冇晒啲積蓄，你都試過，你失業嗰年，咩錢都俾你燒清光啦，存款跌至零，仲差咭數添，你而家咪又係死唔去。」

另一個我說：「係喎，點解我仲可以好哋哋喺度？」

我說：「未夠鐘囉，主都未call你番天家。」

另一個我說：「有冇一啲積極啲嘅講法呀？」

我說：「你就係冇晒錢嗰陣決主信主，跟住就慢慢清醒，知道馬死，肯落地跟主一步一步行，行行吓，而家仲行到去音樂度添。」

另一個我說：「係喎，我都試過晒囉，啱啱仲喺度驚乜？」

我說：「驚隻馬又死，唔肯落地跟主行掛？」