本週反思#218💬

「無用的僕人，怎樣事奉主呢❓」

甘心樂意無條件事奉主。

……

12/01/2022（三）18:30 香港國際音樂學校3樓

我坐在長凳上吃西炒飯，喝凍檸茶之際，學校行政走過來。

行政說：「偉雄。」

我說：「晚安。」

行政說：「有樣嘢想搵你幫幫手？」

我說：「咩嘢呀？」

行政說：「合唱團Musical啲歌嘅歌詞咪英文寫嘅。」

我說：「係。」

行政說：「副校長想搵你翻譯成中文？」

我說：「哦，點解？」

行政說：「想俾英文唔係咁好嘅人，理解多啲啲歌詞講咩。」

我說：「哦，咁好。」

行政說：「唔該晒，我搵人打咗英文歌詞email俾你。」

我說：「好。」

行政說：「我send一首俾你先，譯咗俾副校睇吓得唔得，得就譯埋其他。」

我說：「好。」

……

另一個我說：「做咩應承得咁口爽？」

我說：「有咩問題？」

另一個我說：「你都冇問人工幾多？」

我說：「佢唔係話聘請我喎，佢話搵我幫手咋喎。」

另一個我說：「咁咪即係做義工？」

我說：「主都安排咗份正職俾我囉，夠生活、夠交租、夠養貓、夠養狗、夠交埋學費添啦，做吓義工有咩問題呀？何況啲歌詞仲要全部都係同主耶穌有關嘅，明顯係事奉主嘅好機會啦。」

另一個我說：「點解要搵你呀？」

我說：「我唔知。你想知一係就追上去問行政，唔係就祈禱問主啦！」

另一個我說：「一定係要你做架？」

我說：「邊有話一定呀？啱啱嗰行政好客氣咁問我可唔可以幫幫手咋喎。」

另一個我說：「幫幫手，即係冇油水撈啦。」

我說：「而家創天造地拯救世人嘅主，派行政嚟邀請我，喺佢培育我成為音樂人才嘅音樂學校嗰度，透過翻譯歌詞嚟事奉佢。機會難逢呀，仲油水！」

另一個我說：「你都癡線，我都係祈禱問吓主有咩回報先好落筆。」

我說：「喂，你知唔知自己係乜水？」

另一個我說：「嶺大翻譯學士、中大翻譯碩士囉。」

我說：「你僕人嚟架咋。」

另一個我說：「咩呀？」

我說：「我哋唔單止係僕人，準確啲根據路加福音17章10節黎講，我哋係無用嘅僕人嚟架咋。」

另一個我說：「你就冇用，我識翻譯架，點會無用？」

我說：「無用，唔係講緊你嘅翻譯能力，係講緊你啲事奉態度，事奉主係僕人嘅本分都唔知？你以為自己好巴閉，自己作用大到主無咗你唔得呀？主要翻譯，周街都係。」

另一個我說：「哦…聖經話僕人要謙卑事奉主，我知。」

我說：「知你又要祈禱追問主有咩回報先落筆？」

另一個我說：「我知，唔小心次序攪錯咗咋嘛。咁我事奉咗先，做完先再同主開單Claim數！」

我說：「都錯。」

另一個我說：「咁都錯，即係要我白做？」

我說：「咁又未必。」

另一個我說：「即係點呀？」

我說：「我哋事奉主，主究竟回唔回應，如果回應，幾時回應、點樣回應，呢啲主自有分數。」

另一個我說：「嘩，咁我咪冇say？」

我說：「都話事奉主係僕人嘅本分囉，本分即係本來應分做，冇條件做架嘛，你仲想say啲咩呀？」

另一個我說：「…….」

我說：「不過事奉開主嘅，熟識主嘅，主點樣對啲僕人，心裏有數啦。」

另一個我說：「有你個屁呀！我而家淨係計到，翻譯條數主最終唔找嘅話，呢鋪我就得嗰做字。」

我說：「你又唔識主，又唔信主。唉，你唔好做主嘅僕人啦。」

另一個我說：「咁我去做咩呀？」

我說：「做大耳窿啦去。」