本週反思#291💬

「我哋唔可以話耶穌，點解❓」

主捨命，為我哋帶黎救贖。

……

25/07/2023（二）14:00 家

我幫筒筒刷牙之際……

媽媽說：「我早幾日鏟你老豆。」

我說：「做咩呀？又講當年佢離家出走呀？好心啦。」

媽媽說：「唔係講呢啲呀。」

我說：「咁唔係因為乜嘢鏟佢？」

媽媽說：「耶穌。」

我說：「耶穌？講黎聽下。」

媽媽說：「早兩日，我同你老豆拖皮皮出街。行到以前華仁堂對出嗰條天橋嗰陣，撞到班耶穌友喺度叫人信耶穌。」

我說：「佢哋同你哋傳福音呀？」

媽媽說：「唔係。嗰陣我哋喺橋頭，佢哋喺橋尾。一見到嗰班耶穌友，你老豆就講嘢啦。」

我說：「佢講咩呀？」

媽媽說：「佢話，班耶穌友又喺度周街講耶穌，日講夜講都唔知有乜好講。」

我說：「跟住呢？」

媽媽說：「跟住我咪鏟佢囉。」

我說：「點鏟法？」

媽媽說：「我話佢，人人都話得耶穌，喺你唔話得。」

我說：「點解？」

媽媽說：「耶穌救過佢三次，忘恩負義。」

我說：「邊三次？」

媽媽說：「第一次，佢糖尿廿幾度，加埋肺癆，即刻送佢入聯合，執番條命。聯合係基督教醫院嚟架，唔係耶穌，佢瓜咗啦。」

我說：「咁第二次呢？」

媽媽說：「第二次，聯合轉介佢入靈實，十個入靈實九個香，你阿公咪喺靈實摺埋嗰囉。你老豆喺靈實嗰陣，我已經叫佢得閒就好寫定晒啲食譜，臨終前傳授佢嗰幾度拿手小菜俾我哋，一陣佢香咗，都仲有啲建樹留番俾屋企。點知耶穌竟然帶佢出靈實喎？」

我說：「咁第三次？」

媽媽說：「你真係失憶。第三次，佢有一晚突然脷腫，腫到佢話好難抖氣。喺你話要即刻送佢入聯合，打咗支針佢先死唔去咋，醫生話再遲啲佢有機會窒息死亡。」

我說：「好似印象中有呢件事。」

媽媽說：「你話啦，耶穌救咗佢三鑊，而家執番條老命死唔去，就喺度得戚話耶穌。佢有資格話耶穌咩？佢冇。我唔鏟醒佢，佢仲喺度發緊夢。」

我說：「鏟得啱呀。」

媽媽說：「鏟得啱喱？」

……

另一個我說：「話耶穌，你老豆唔可以，你可以喎。」

我說：「我都唔可以。點解我可以呀？」

另一個我說：「第一，你冇糖尿，冇肺癆，唔駛耶穌送你入聯合。」

我說：「聯合我遲早入架。第二呢？」

另一個我說：「第二，你唔駛入聯合，就唔駛耶穌叫醫生轉介你入靈實啦。」

我說：「靈實我都未必走得甩架，第三呢？」

另一個我說：「你條痢冇腫，唔係漏夜再送入聯合。」

我說：「就算係咁，我都唔可以話耶穌。」

另一個我說：「你係咪有咩事我唔知呀？你係咪曾經有急病重症俾人送過入聯合同靈實呀？」

我說：「暫時冇。」

另一個我說：「咁點解你唔可以話耶穌呀？」

我說：「因為我有罪，耶穌為我捨命贖罪，俾機會我選擇跟從佢得永生，享受永遠同佢一齊囉。」

另一個我說：「咁就人人都話得耶穌，係你同你老豆兩個唔話得啦。」

我說：「錯晒，你都唔話得耶穌喎。」

另一個我說：「我點解唔話得耶穌？」

我說：「你都有罪呀！耶穌已經為你捨命贖罪，而家仲等緊你接受拯救添呀。忘恩負義！」