本週反思#261💬

「疑惑憂慮，如何分解❓」

是就說『是』，不是就說『不是』。

……..

20/12/2022（二）08:00 華漢茶餐廳

我說：「阿媽，我覺得你變咗少少。」

媽媽說：「嗰少少係咩？」

我說：「冇咁煩。」

媽媽說：「乜我好煩咩？」

我說：「係呀。」

媽媽說：「點煩法？」

我說：「之前啲嘢問完又問，而家問少咗啲。」

媽媽說：「係咩？」

我說：「係。你知唔知以前自己問完又問？」

媽媽說：「知。我問完又問，係要問清楚啲。」

我說：「點解問多幾次，就會清楚啲？」

媽媽說：「因為唔出聲講清講楚，九成九都係衰嘢。」

我說：「呢個諗法邊度得黎？」

媽媽說：「你老豆。」

我說：「我老豆？」

媽媽說：「當年，你老豆話唔想打佢做緊嗰份工，我問佢係咪已經搵到第二份？」

我說：「老豆點答？」

媽媽說：「唔答。」

我說：「咁即係已經有第二份工？」

媽媽說：「冇啦梗係。我同佢講，做男人要負責任，搵到工先好辭。」

我說：「老豆點答？」

媽媽說：「唔答。」

我說：「咁即係有冇積極搵工？」

媽媽說：「梗係冇啦。」

我說：「咁老豆有冇答你點負責任？」

媽媽說：「都話唔答囉。」

我說：「哦，所以你就成日問完又問，食飯咁簡單嘅嘢，都問我幾次。」

媽媽說：「問清楚好啲，答咗都未必做，何況唔答？」

我說：「但係你而家問少咗喎，今年做冬食飯你只係問咗我一次啫。」

媽媽說：「你清楚答咗我12月23嘅星期五夜晚8點前會番到屋企呀嘛，咁咪唔駛再問囉。」

我說：「我以前夠有清楚答你，你又問完再問？」

媽媽說：「你而家唔同。」

我說：「我而家有咩唔同？」

媽媽說：「你而家變得清楚好多，時、地、人齊晒，仲要得就話得，唔得就話唔得，未決定就未決定。」

我說：「我係咁？」

媽媽說：「仲要話咗得就做，話咗唔得就打死都唔做。」

我說：「咁我而家似唔似老豆當年？」

媽媽說：「冇忽似。」

我說：「咁咪好囉。」

媽媽說：「咩咁好？」

我說：「你咪唔駛再鬼死咁煩，我清清楚楚答咗你一次，你就唔駛再問，減少成日喺度浪費時間。」

媽媽笑，說：「你冇句好。」

……

另一個我說：「你真係孝順。」

我說：「多謝。」

另一個我說：「為咗減輕媽媽俾你爸爸當年攪成嘅疑惑憂慮，你改變自己。」

我說：「我改變自己，同我阿媽無關。」

另一個我說：「點會無關呀？頭先嗰場面咁溫馨。」

我說：「點會有關呀？我今日食早餐先啱啱知道，原來我阿媽之前咁鬼煩，其中一個主因係，我老豆十問九唔應，不負責任攪成嘅。但係我三年前開始讀音樂嗰陣，已經變成而家咁架啦，如果我仲係拖泥帶水，十問九唔應，不負責任嘅，點讀音樂呀？點讀作曲呀？成場表演，你聽到睇到嘅嘢，幾乎全部都關我事。」

另一個我說：「三年前開始讀音樂嗰陣已經係咁，你學邊個架？」

我說：「耶穌囉。佢喺《馬太福音5:37》話：是就說『是』，不是就說『不是』。」

另一個我說：「哎呀…你阿媽憂慮係你阿媽嘅事，耶穌呢一句我點都唔會學架啦。」

我說：「我一早知你係縮頭烏龜，正一垃圾架啦，所以我讀音樂之前已經同你劃清界線。」

另一個我說：「我都冇講點解呢一句我唔學，你憑咩話我縮頭烏龜，正一垃圾呀？仲同我劃清界線？」

我說：「你，是，唔敢說『是』，因為你唔想付上代價，講完『是』唔想落實做嘢埋單。你不是，唔敢說『不是』，因為你怕得罪人，愛眼前嗰個人，多過愛主。」