本週反思#200💬

「佢唔幫我，仲有邊個幫我❓」

若謙卑求助，大把。

…….

03/11/2021（三）18:00 家

我放工回家，執拾行裝，準備出去。

媽媽說：「出去呀？」

我說：「係呀。」

媽媽說：「又音樂呀？」

我說：「係呀。」

媽媽說：「我想你幫我上地鐵嗰網到申請啲嘢。」

我說：「申請啲咩？」

媽媽說：「樂悠咭。」

我說：「咩黎架？」

媽媽說：「搭地鐵兩蚊囉。」

我說：「你合資格申請咩？」

媽媽說：「以前65歲先申請得，而家60歲就得啦，我都夠60歲囉。」

我說：「你點知而家60歲就得？」

媽媽說：「上網Check囉。」

我說：「你上得網Check都唔申請埋？」

媽媽說：「唔識點㩒呀嘛，識㩒仲駛等你？」

我說：「哦，咁呢個唔急呀。」

媽媽說：「你唔急我急，我想快啲有2蚊車搭。」

我說：「我而家趕時間，出去啦。」

媽媽說：「你幾時得閒喺度？」

我說：「星期五晚。」

媽媽說：「等你救命，真係死得。」

……

04/11/2021（四）07:30 家

我帶皮皮、筒筒散步回來。

媽媽說：「聽晚唔駛煩你啦。」

我說：「煩咩呀？」

媽媽說：「申請樂悠咭呀。」

我說：「你自己攪惦呀？又話唔識？」

媽媽說：「唔識就係唔識，我搵咗人幫我啦。」

我說：「老豆幫你？」

媽媽說：「佢識鬼咩？手機我叻過佢。」

我說：「咁搵咗邊個？」

媽媽說：「我嗰女囉。」

我說：「阿妹？」

媽媽說：「係呀，你阿妹尋晚番黎食飯呀嘛，我咪即刻叫佢幫我申請樂悠咭囉。」

我說：「咁醒嘅你，我唔得閒，識搵第二個幫手。」

媽媽說：「梗係啦，唔通喺度戇居居等你呀？我唔係淨係有個仔，仲有個女架嘛。」

…….

另一個我說：「你阿媽有仔有女，仔唔幫就女幫。我冇仔冇女，都唔知可以搵邊個幫？」

我說：「周圍搵人幫囉。仔女咪又係人？」

另一個我說：「人哋同我有親？」

我說：「有親呀，周街都係耶穌嘅人，同屬主內一家。」

另一個我說：「主內一家都未必一定幫啦，好似你咁。」

我說：「我唔係唔幫，唔即刻幫姐。」

另一個我說：「咁多狡辯，唔即刻幫就唔好幫！」

我說：「點解你叫就一定要幫你呀？仲要即刻幫你？你當咗自己係乜水？命令呀？主連佢下嘅命令都俾時間人考慮，俾人揀跟唔跟啦。何況你？」

另一個我說：「就係有你呢啲咁嘅人喺度，我咪冇人幫囉。」

我說：「咁除咗我，你仲有冇搵過其他人幫？」

另一個我說：「冇，我祈禱叫主親自出手直接幫我。」

我說：「嘩，唔講以為你先係主，咁你祈完禱，有冇見到主親自出手？」

另一個我說：「冇。」

我說：「咁見唔到主，見到啲咩？」

另一個我說：「人。」

我說：「如果主一直都冇打算親自出手，而係預備咗唔同嘅人一路幫你呢，咁你有冇打算出口求問呀？」

另一個我說：「有心幫我嘅，就自己主動行埋嚟。」

我說：「謙卑求主嘅，要自己主動走過去。」