本週反思#189💬

「真信定假信，只有主知道❓」

若真心信主，自己也必清楚。

……

15/08/2021（日）10:00 Zoom

Zoom早上查經，有位姊妹分享。

姊妹說：「我嗰仔決志信主，領埋洗，後黎又話自己唔係信主，唔係基督徒，係無神論者。我真係唔係好明，究竟佢知唔知自己信定唔信？」

有位弟兄回應。

弟兄說：「其實我哋係咪真係信，得主一個知道，好多時連自己話信，都唔係真係好清楚自己係咪真係信架咋。」

兩人繼續交流。

……

另一個我說：「喂，立即開咪。」

我說：「佢哋都未講完，尊重吓人呀唔該。」

另一個我說：「咁佢哋講完即刻開咪。」

我說：「咁急做咩？搶到咪有多張消費卷呀？」

另一個我說：「你聽唔到嗰弟兄講咩呀？」

我說：「佢講咩呀？」

另一個我說：「佢話，好多時連當事人自己話信，都唔係真係好清楚自己係咪真係信呀！」

我說：「有咩咁出奇呀？」

另一個我說：「你而家信唔信主？」

我說：「信。」

另一個我說：「你而家清唔清楚自己信？」

我說：「清楚。」

另一個我說：「你憑咩咁清楚知道自己信呀？因為你同嗰姊妹嗰仔一樣，領咗洗呀？」

我說：「我口裏承認耶穌是主，心裏相信基督從死裏復活呀。」

另一個我說：「慳啲啦，識字嘅都即刻讀得出啦。」

我說：「我信主前屋企係點，信主後屋企而家變成點，你睇唔到呀？」

另一個我說：「你信主前屋企係點，咸豐年前嘅事囉喎，唔多記得。」

我說：「我信主前個人係點，信主後個人變成點，你都睇唔到呀？」

另一個我說：「你信主前個人係點，都係古代啦，可唔可以帶我番2021年呀？」

我說：「你識唔識字？」

另一個我說：「食矇咗呀你，我翻譯碩士黎架，日日教緊人轉換文字呀，唔識點教呀？」

我說：「我信主前同主無關係，唔察覺同主有咩經歷，信主後變成個個禮拜分享我同主日日同行嘅真實體驗，我今個禮拜寫嗰篇，你睇唔睇到呀，翻譯碩士？」

另一個我說：「睇到。」

我說：「睇得清唔清楚呀？」

另一個我說：「清楚。」

我說：「連你都睇得咁清楚嘅，我呢個當事人點會唔清楚自己信主呀？」

另一個我說：「咁清楚，仲開咪回應？」

……

我開咪。

我說：「關於信，我有嗰信念，同啱啱弟兄分享嘅係相同嘅。」

我說：「我都相信，主好清楚我信唔信佢。」

我說：「但係關於信，我亦有個真實體驗，同啱啱弟兄分享嘅係唔同嘅。」

我說：「一初領洗，我都以為自己信主。但係後黎睇咗聖經主點講真信心，加埋一啲經歷同反思之後，我知道自己根本唔係信主，係喺度自欺欺人。承認唔係信主之後，再發生好多好多事，我真係真心悔改信主。由我真心信主開始，我好清楚我就係信主。我而家好有信心，我死咗一定會番天家。」