本週反思#246💬

「主何時使萬事互相效力❓」

超時空。

……

17/07/2022 （日）19:30 星光行

我有幸獲主任邀請，參與小提琴聚會。一輪練習之後，

主任說：「大家停一停，過嚟。」

同學停止練習，走過來。

主任說：「偉雄，你講呀。」

我說：「係。大家好，我係偉雄，係作曲文憑嘅一年級生。今次過嚟係想同大家見過面，攞啲資料，我而家作緊曲，到時作好之後想邀請大家，睇吓大家下學年作曲發佈會幫我奏。」

同學點頭。

我問過所有同學的名字，掌握的樂器和樂器考試的等級。

我說：「OK架啦，非常感謝。」

同學返來原位練習。

我返回座位的電腦前面，繼續整理樂譜。

一會兒，同學Charmaine坐下來休息。

Charmaine說：「幾時作曲發佈？」

我說：「下年11月。」

Charmaine說：「開始作未？」

我說：「開始作咗第一首。」

Charmaine說：「咩黎？」

我說：「Woodwind Quintet（管樂五重奏）。」

Charmaine說：「開黎睇吓？」

我打開Sebelius，展示樂譜。

我說：「拿。」

Charmaine說：「咦，有鋼琴。」

我說：「係呀，鋼琴主要打節奏，負責少少和聲咁啦。」

Charmaine說：「搵咗人彈未？」

我說：「未呀，啱啱作好第一首嘅初稿咋。」

Charmaine說：「諗住搵邊個？」

我說：「Flute（長笛），諗住搵Gavin。」

Charmaine說：「仲有呢？」

我說：「Oboe（雙簧管），諗住搵Niki。」

Charmaine說：「仲有呢？」

我說：「Saxophone（色士風），諗住搵Docras。」

Charmaine說：「仲有呢？」

我說：「Piano（鋼琴）。」

Charmaine說：「咁嗰鋼琴諗住搵邊個呀？」

我說：「未諗。」

Charmaine說：「不如鋼琴等我黎。」

我說：「好呀。不過鋼琴嗰節奏我寫比較複雜喎。」

Charmaine說：「OK。」

我說：「其實我仲要搵多個鋼琴？」

Charmaine說：「Cathy。」

我說：「都好呀。」

Charmaine說：「其實我、Gavin、Niki、同Cathy，另外有個Group，一切夾嘢架。」

我說：「咁啱？咁而家你哋咪成Group幫我奏首Woodwind ？」

Charmaine說：「冇錯。」

……

另一個我說：「又會咁啱嘅？」

我說：「咁啱？」

另一個我說：「係呀，咁啱。」

我說：「幫我奏嗰5個同學有4個係同一Group喎，咁多咁啱？」

另一個我說：「係咁多咁啱呀。」

我說：「咁多咁啱，你夾俾我睇呀？」

另一個我說：「咪住，佢哋Group幾時夾成？」

我說：「我啱啱問Charmaine先知佢哋有嗰Group，一定係我報名參加作曲發佈之前啦。」

另一個我說：「嗰陣你名都未佈，曲都未作，超時空，我點幫你夾？」

我說：「超越時空咁夾，你夾唔到，主夾到。」