本週反思#230💬

「如何拒絕視主為占卜師嗎❓」

雖結果未明，仍試行

……

2022/05/10（二）09:00 Band房

另一個我說：「你就作曲文憑畢業嗰囉喎。」

我說：「仲有一年，漫漫長路。」

另一個我說：「一年好快架咋。」

我說：「咁你想點？」

另一個我說：「畢業諗唔諗住讀上去？」

我說：「讀上去。」

另一個我說：「點解仲讀？」

我說：「我想做全能作曲家。」

另一個我說：「即係以前嗰啲又識作，而家嗰啲又識攪呀？」

我說：「全中。」

另一個我說：「出國讀？順手移民？」

我說：「唔啦。阿妹升職，阿媽唔走，老豆長期病患，隨時行得，有咩事我唔想嗰人唔係度。」

另一個我說：「咁即係喺香港讀啦，想讀邊間？」

我說：「香港演藝學院。」

另一個我說：「讀邊科？」

我說：「作曲及電子音樂系，報名先。」

另一個我說：「點報？」

我說：「寄電郵問演藝啦。」

另一個我說：「咪住，都係祈禱問吓主先啦。」

我說：「問咩啫？問主點報名呀？」

另一個我說：「唔係，問主報唔報名好？」

我說：「主而家咪喺部電腦度Show咗演藝嗰網頁同埋聯絡方法俾我睇囉。」

另一個我說：「都係主話報，先再問點報名。」

我說：「你打算祈禱問主問幾耐？」

另一個我說：「祈到主答我為止。」

我說：「主唔答你呢？唔問唔報呀？」

另一個我說：「我不斷祈禱，唔係就搵多幾個人禱告，再唔係就搵晒我身邊嘅人一齊禱告，一定感動到主答我，話我知報唔報好。」

我說：「點解係要主答你話好，你先肯去問去報？」

另一個我說：「主話好，即演藝肯收我啦，確認咗收就唔怕報。」

我說：「主唔會答你。」

另一個我說：「點解？」

我說：「你當主係占卜師呀？攞嚟做沙盤推演，卜到吉象，知道結果先行。」

另一個我說：「我唔係咁諗。」

我說：「唔係咁諗？咁你仲唔去send email俾演藝，詢問報名資料同方法。」

另一個我說：「咁主即係，送唔送我入演藝啫？」

我說：「主而家已經帶你搵到演藝學院嘅網頁同聯絡方法架啦，你問就問，唔問就唔好阻住我。」

另一個我說：「你咪係我囉，我唔問，你可以點？」

我說：「我可以背棄你，跟從主行先一步，即刻send email去問演藝點報名囉。」