「如何靠聖靈、憑信心而活❓」
運用主所賜的，肩付起奉獻的責任。
……
另一個我說：「你銀行做咩嗰個月有筆定額支出嘅？」
我說：「喂，你睇之前有冇問過我？」
另一個我說：「哎呀，你估你有好多積蓄咩？一眼睇晒。」
我說：「呢啲唔係多少問題，係私隱問題，都唔識尊重。」
另一個我說：「葉sir，請問可唔可以透露一下筆定額支出喺咩黎嘅呢？」
我說：「你呢個mode就差唔多。」
另一個我說：「咩黎架？講啦。」
我說：「奉獻黎嘅。」
另一個我說：「個個月奉獻？」
我說：「係呀，自動轉賬，唔駛煩，啱晒我。」
另一個我說：「喂，你而家收入少咗，支出多咗嗰喎。」
我說：「係呀，接少咗課程，交多咗學費，生活費照舊。」
另一個我說：「咁你仲整多筆捐款出嚟？」
我說：「呢個金額我完全無問題。」
另一個我說：「唔怪之得你老豆老母話你冇錢淨啦。」
我說：「你係咪學者嚟架？佢哋講兩句你就信到十足，唔駛求證嘅！冇錢想轉賬啲信心出去呀？」
另一個我說：「筆錢你幾時開始捐架？」
我說：「大概喺我決定暫停短宣中心嘅出隊事奉，全身去讀音樂嗰陣。」
另一個我說：「咁咪奉獻咗成年有多？」
我說：「其實你唔係成日check住，唔係好覺架咋。」
另一個我說：「做咩無啦啦個個月奉獻？」
我說：「我靠聖靈、憑信心過日子呀嘛。」
另一個我說：「噏乜呀你，喺度背書！」
我說：「我相信主天天供應，事實真係日日有工開有飯食；所以我就回應聖靈感動，月月奉獻去支持短宣工作，夠清楚未？」
另一個我說：「顧惦自己先啦你。」
我說：「我奉獻完仲有錢交租交學費，咁就證明完全無問題啦，多餘。」
另一個我說：「佢哋喺主嘅用人，係靠聖靈、憑信心過日子架，駛乜你多事。」
我說：「宣教唔駛錢運作？啲傳道人、同工食風呀？你究竟係咪靠聖靈、憑信心過日子架？」
另一個我說：「我梗係，我決咗志信主架啦，個個禮拜日朝早都有番教會崇拜同查經架。」
我說：「你都係？乜靠聖靈、憑信心過日子嘅人，會唔盡心盡意盡性盡力愛主，會連為主嘅家，喺荷包裏面攞一毫半子出嚟都會唔願意嘅咩？」
另一個我說：「你所謂嘅靠聖靈、憑信心過日子，都係奉獻俾短宣中心咁大把啫？」
我說：「唔止，我由第一日加入《Maggie移加講耶穌》群組開始，都有奉獻嗰喎。」
另一個我說：「嘩，咁你每個月奉獻條數幾大呀？會唔會唔夠錢讀音樂架？」
我說：「我都冇輟學，第三學期都交齊學費，繼續番學。你咁擔心做咩呀？你唔係話你靠聖靈、憑信心過日子嘅咩？」
發表新回應