「見證主，何時最好❓」
而家。
……
15/04/2022 (五) 19:00 Band 房
另一個我說：「錄影。」
我說：「錄咩影呀？」
另一個我說：「錄你彈琴囉。」
我說：「點解要錄我彈琴呀？」
另一個我說：「就嚟學生音樂會啦，錄低先睇得清楚你彈成點，有咩要改進架，有片有真相。」
我說：「遲啲先啦，學生音樂會仲有成個月。」
另一個我說：「而家！錄完send俾主任睇，你得番一個月時間執咋。」
我用I-pad錄了自己彈奏了Burgmuller的L’Adieu。
我說：「攪惦。」
另一個我說：「send俾主任啦。」
我說：「send咗啦，食飯。」
……
15/04/2022 (六) 07:00 家
我醒了。
另一個我說：「喂。」
我說：「早晨。」
另一個我說：「send尋日錄嗰條片落《Maggie移加講耶穌》群組，再加段鼓勵說話。」
我說：「癡線！嗰群組咁多人。」
另一個我說：「多人有咩問題？」
我說：「而家彈得咁樣衰，多人睇到咪勁樣衰囉。」
另一個我說：「做乜咁緊張自己樣唔樣衰啫？」
我說：「唔緊張自己，緊張邊個？」
另一個我說：「主囉。」
我說：「我send唔send嗰video落嗰群組度，關主咩事？」
另一個我說：「send嗰video落群組度俾組員睇下，你跟主而家練琴練到去邊，見證主一直同行支持。」
我說：「唉，遲啲先。」
另一個我說：「遲到幾時？」
我說：「學生音樂會之後。」
另一個我說：「而家！」
我說：「點解係要而家？」
另一個我說：「今日復活節，係鼓勵一下大家要時刻靠主迎接挑戰嘅好機會。」
我說：「唉，遲啲先。」
另一個我說：「而家！而家send，主一定開心。」
我說：「你又知？」
另一個我說：「主耶穌呼召漁夫跟從佢嗰陣，都係而家架啦，學生音樂會之後先呀？」
我說：「但係我而家練得嗰半桶水，好樣衰。」
另一個我說：「放心，你嗰半桶水，主一定樂意接受。」
我說：「你又知？」
另一個我說：「罪人咁樣衰主都接受啦，你手琴唔會樣衰得過你充滿罪嗰個衰樣架。」
我說：「主接受，組員唔知接唔接受呢？」
另一個我說：「組員鍾意咪接受，唔鍾意咪唔接受囉，關你咩事？」
我說：「組員唔鍾意，唔接受，我咪超樣衰囉。」
另一個我說：「你決志嗰陣又話將自己整個生命交咗俾主嘅？原來而家連個衰樣都未肯交出嚟。」
我說：「我而家即刻send。」
另一個我說：「加句鼓勵說話。」
……
我把彈奏錄影短片上載至《Maggie移加講耶穌》WhatsApp群組。
我說：「這是我過去一年來，一直隨主練習彈奏，預備學生音樂會的首次錄影嘗試。現分享一下，祝大家復活節想起，主時刻與你一起面對各種的挑戰。」
發表新回應