「聽到旁人比你叻，比你好，如何離開妒忌❓」
立即跟隨最叻最好的主，起程一直前往主為我預備的地方。
……
31/03/2022（四）19:30 Band房
妹妹致電。
妹妹說：「得唔得閒呀而家？」
我說：「OK，講啦。」
妹妹說：「我升職啦。」
我說：「嘩，你又升職？」
妹妹說：「係呀，我又升職，每換一次日本老世，就升一次職。」
我說：「第一次？」
妹妹說：「第一次，我就由Marketing Assistant（市場營銷助理）升做Marketing Chief（市場營銷主任）。」
我說：「第二次？」
妹妹說：「第二次，我就由Marketing Chief（市場營銷主任）升做Marketing Assistant Manager（市場營銷助理經理)。」
我說：「第三次？」
妹妹說：「第三次，我就由Marketing Assistant Manager（市場營銷助理經理)升做Marketing Manager（市場營銷經理）。」
我說：「恭喜晒你。」
妹妹說：「多謝。」
我說：「要買壽司食慶祝先得啦，返黎call我。」
妹妹說：「好呀。」
我說：「你真係叻，主好眷顧你。」
妹妹說：「係呀。」
……
另一個我說：「喂。」
我說：「唉，又係你呀？有咩講，快啲講。」
另一個我說：「我係要慢慢講呀，我係咁喺你耳邊咦咦哦哦，我睇你走得去邊？」
我說：「講啦。」
另一個我說：「你2009年開始喺浸大SCE做咩職位？」
我說：「兼職講師。」
另一個我說：「你2016年開始喺公大LiPace做咩職位？」
我說：「兼職講師。」
另一個我說：「你2021年開始喺港大CC做咩職位？」
我說：「兼職講師。」
另一個我說：「你醜唔醜？阿妹出道遲過你，已經連升三級；你喺呢行轆黎轆去，都係兼職講師？」
我說：「傻架你，教大學仲醜？一個二個DSE考生日讀夜讀，不眠不休，都喺為咗入大學讀咋，我而家我喺大學教呀。」
另一個我說：「最弊教黎教去都係兼職講師呢。」
我說：「係咁又點？」
另一個我說：「信主嗰個係你，但係主喺事業上眷顧嗰個係阿妹，你唔覺得主唔公平嘅咩？」
我說：「主鍾意眷顧邊個就邊個，唔到你同我喺度指手劃腳！」
另一個我說：「好呀，唔講公唔公平。講妒忌，阿妹連升三級，你就兼職講師止步，你唔妒忌嘅咩？講真話！」
我說：「妹妹頭兩次升職，我喺有妒忌嘅！」
另一個我說：「哦，終於肯認啦！咪住，頭兩次，咁今次呢？」
我說：「今次我唔妒忌。」
另一個我說：「點解呀？今次阿妹事業更進一步，比頭兩次叻過你，好過你仲更加多喎。」
我說：「因為我認識咗最世界最叻最好嘅……」
另一個我說：「主耶穌呀嘛，你2009年已經決志信咗，2012年領埋洗添啦。2009年開始信主嗰陣，你就妒忌，而家2022年信咗主13年，你就唔妒忌呀？」
我說：「唔關信咗幾耐事！」
另一個我說：「咁今次點解會唔妒忌？」
我說：「因為2020年10月，我全身跟住最世界最叻最好嘅主走咗，而家離妒忌越來越遠。」
另一個我說：「走咗去邊呀？」
我說：「主一早為我預備好嘅地方。」
另一個我說：「咩地方？」
我說：「學音樂嘅地方。」
另一個我說：「嗰地方點架？」
我說：「好清優，鳥語花香，喺半山。」
另一個我說：「邊度嚟架？世外桃源呀？我去唔到架？」
我說：「去到，嗰度叫慈雲山，3D巴士直到門口。」
另一個我說：「搭3D上去慈雲山，就可以遠離妒忌？」
我說：「唔一定得。」
另一個我說：「咁點先一定得？」
我說：「同主一齊搭先得！」
另一個我說：「有咩分別？」
我說：「分別就係同主一齊上嗰架3D，一去冇回頭。」
另一個我說：「咁喺架同主一齊上嘅3D上面，聽到妹妹第三次升職嗰陣，你嗰心係諗咩？」
我說：「諗嘅唔係妒忌。」
另一個我說：「唔係妒忌，係咩？」
我說：「諗緊到站落車嗰陣，主準備介紹俾我學嘅下一首音樂究竟喺咩囉！」
發表新回應