本週反思#220💬

「明天作見證，說什麼好❓」

與主當下嘅同行經歷。

……

21/03/2022（一）15:21 Signal

香港國際音樂學校副校長傳來短訊。

副校長說：「聽日合唱團，我會宣傳一下你《耶穌烘焙坊》嘅網站。到時我想你分享一下點解想攪個網站，你預備一下。」

我說：「OK。」

……

另一個我說：「喂，你又OK？」

我說：「喂，你又有乜唔OK呀？」

另一個我說：「聽日就要分享啦！你聽唔到副校長講呀？」

我說：「聽日咪聽日囉，又唔係叫我去死，叫我分享一下咋嘛。」

另一個我說：「無啦啦，分享啲乜嘢？」

我說：「咪講咗話嗰網站囉。」

另一個我說：「嗰網站有咩好講？」

我說：「嗰網站有主拯救我嘅見證。」

另一個我說：「N年前嘅事啦，仲有呢？」

我說：「仲有我寫嗰啲每週反思囉，有問有答，篇篇你都有出場架。」

另一個我說：「除咗字，仲有冇其他？」

我說：「每篇反思最底仲有幅圖，我好俾心機上網搵架，幅幅都係想表達主究竟喺點嘅。」

另一個我說：「除咗圖，仲有啲咩？」

我說：「仲有我作嘅曲，作完仲用Logic整理過下啲聲添，主搵專人教我作教我整架。」

另一個我說：「唔怪之得副校長一邀請，你就OK、OK啦，咁多嘢分享。」

我說：「副校長邀請你，你夠可以OK、OK囉。」

另一個我說：「我唔OK，唔OK。」

我說：「點解你唔OK？」

另一個我說：「你就有嗰網站講姐，我都唔知有咩可以分享？」

我說：「咪分享你同主同行嘅經歷囉，離分享都仲有成日，乜你一日24小時嘅生活裏面，冇一秒有主架？」