本週反思#202💬

「世界價值的束縛，如何擺脫❓」

放手跟隨主起行，發掘自身潛藏的豐盛價值。

…….

13/11/2021（六）19:00 家

課堂結束。

學生說：「葉sir，你而家音樂讀成點？」

我說：「啱啱開始作曲文憑第一年。」

學生說：「我都有個中學同學，畢業之後去讀音樂。」

我說：「哦，同路人。」

學生說：「佢吹長笛。」

我說：「哦，長笛，好聽呀。」

學生說：「佢去咗法國讀，主修長笛。」

我說：「咁叻，出國讀。」

學生說：「讀完番嚟香港。」

我說：「咁而家點？」

學生說：「而家都唔係好搵到錢。」

我說：「哦，都OK啦，長笛佢都想學架嘛，好似我而家讀作曲咁。」

學生說：「咦？不過一初識你，你唔係話讀書就係為咗要搵錢咩？」

我說：「乜嗰陣我係咁講呀？」

學生說：「你係咁講，但係啱啱你就話搵到想學嘅都OK。」

我說：「哦，咁我變咗啦。」

……

另一個我說：「你變成點？」

我說：「我由淨係搵錢，變成會追尋錢以外嘅嘢。」

另一個我說：「即係咩嘢？」

我說：「即係潛藏喺我身上嘅豐盛價值，要跟隨主發掘嗰啲。」

另一個我說：「我都想，不過發掘都要成本，你而家好疊水呀？」

我說：「唔係，夠錢生活交學費咋。」

另一個我說：「唔疊水你又黎學人搵價值？搵錢先啦！」

我說：「而家有搵錢呀，搵少啲咋嘛。咁第時作曲作得好，啲錢一樣搵得番嚟架。」

另一個我說：「作曲啲錢好易搵架？易過教長笛？定係易過教英文？人哋去完法國浸埋咸水番黎都撈唔起呀！」

我說：「我唔知，未有人搵過我作曲。」

另一個我說：「長笛都仲可以去琴行教吓小朋友呀。你一陣作到半桶水，首曲都唔知搵邊個要？」

我說：「而家其實連半桶水都未有，不過我繼續學，半桶水遲早都有。」

另一個我說：「當俾你作到半桶水，半桶水，點搵錢？」

我說：「未搵到咪免費分享送住先囉。繼續作繼續學，遲早都滿一桶水。」

另一個我說：「咁咪即係貼錢作曲？要貼到幾時呀？」

我說：「你理得我，我貼又唔係你貼。」

另一個我說：「咁時間唔係成本呀？」

我說：「主咪帶我學緊Logic，減低作曲嘅時間成本囉。而家主仲有工俾我返，業餘學作曲，咪有錢貼囉。」

另一個我說：「主究竟開緊條咩路俾你行呀？」

我說：「主咪開緊條路，俾我跟隨佢，發掘潛藏喺我身上嘅豐盛價值。」

另一個我說：「咩豐盛價值呀？」

我說：「而家已知嘅係，用具體聲音節奏表述抽象情感嘅能力；其他未知，話明潛藏，就梗係要繼續跟隨主發掘架啦。」

另一個我說：「有豐盛價值嘅，點會搵唔到錢呀？」

我說：「我話其他未知，我跟住主行，主到時會話我知架啦。」

另一個我說：「你而家三張幾嘢先開始學作曲，學到幾多歲先滿師？」

我說：「都話未知囉。」

另一個我說：「搵到錢機會幾大？」

我說：「唔大。」

另一個我說：「即係倒米啦。」

我說：「你開口埋口都淨係講錢。」

另一個我說：「好似你咁唔講錢，信耶穌信到離晒地呀？」

我說：「唔講錢就唔番工啦。我只不過係見主供應多一日，條路開多一格，我就行多一步，睇吓前面有咩新發現咋嘛。」

另一個我說：「唉…….」

我說：「你究竟係咪想跟隨主，發掘你自身潛藏嘅豐盛價值架？」

另一個我說：「係。但係現實歸現實，現實係…」

我說：「現實係你企喺度死攬實世界話好嗰啲，點跟隨主行去發掘主認為啱你嗰啲呢？」