「神賜良機，點解會把握唔到❓」
可能係唔想把握到。
......
09/04/2021（五）12:45 家
我說：「有樣嘢想同你商量一下。」
媽媽說：「咩嘢？」
我說：「想睇下我哋可唔可以收養一隻貓。」
媽媽說：「咩貓？」
我打開手機，展示兩隻貓的相片。
我說：「拿。」
媽媽說：「呢隻我唔得，嗰樣好惡。」
我說：「咁呢隻老貓囉，嗰樣唔惡啦掛。」
媽媽說：「邊個架隻貓？」
我說：「我教會嗰牧者去外地工作，帶隻貓去要好多錢，所以想睇吓有冇人肯收養。」
媽媽說：「唔得架。」
我說：「點解唔得？」
媽媽說：「已經有皮皮同埋筒筒啦。」
我說：「咁咪有養寵物經驗囉。」
媽媽說：「間屋有幾大姐？」
我說：「間屋成400尺喎，啲人住100尺劏房都得啦。」
媽媽說：「一日三餐，唔駛餵呀？」
我說：「梗係唔駛啦，你放低啲糧，佢自己肚餓曉食架啦，係你同老豆自己要餵，攞嚟煩之嘛。」
媽媽說：「啲屎呢？」
我說：「皮皮識自己去廁所，筒筒識自己入沙盆。」
媽媽說：「屎唔駛清呀？」
我說：「咪一日三次，一次都唔駛兩分鐘。」
媽媽說：「清潔呢？」
我說：「抹身抹面係你，沖涼吸毛刷牙抹地餵藥全部都係我。」
媽媽說：「有病點算呀？」
我說：「咪睇醫生囉，十次有九次都係我帶我俾錢架啦，連保險都係我買。」
媽媽說：「啲寵物成日係屋企悶架嘛。」
我說：「得皮皮悶咋嘛，貓都唔駛出街嘅。」
媽媽說：「冇能力，唔得呀。」
我說：「唔得？唔想咋？」
媽媽說：「唔係唔想，係唔得！」
我說：「我哋完全有能力，根本就得。」
媽媽說：「養隻寵物，講玩呀？要負責任架。」
我說：「責任，我唔單止講咗點負，仲做埋出嚟囉喎。」
媽媽說：「總之淨係攪皮皮同埋筒筒，我已經心力交瘁。」
我說：「唉，唔想得就罷啦。」
......
另一個我說：「求神幫吓手啦。」
我說：「幫咗啦。」
另一個我說：「幫咗啲咩？」
我說：「咪已經賜咗兩隻性情平和嘅寵物俾我哋學點照顧，又俾埋份工我搵錢，仲有400尺空間囉喎。」
另一個我說：「咁點解會連領養一隻老貓都唔得呀？」
我說：「唔想囉。」
發表新回應