「如何再進一步❓」
跟隨主，不停前行鍛練。
……
15/01/2024（一）1600 香港演藝學院 A121室
老師開門。
老師說：「Yip，到你啦，入嚟。」
我說：「哦。」
老師說：「譜架高度啱唔啱？」
我說：「啱。」
老師遞過一張考卷，卷上有一條節奏和一條旋律。
老師說：「你考呢兩條啦。」
我說：「哦。」
老師說：「4分鐘時間，一條節奏、一條旋律，預備、唱、加指揮，去鋼琴度打嗰Tonic note同Tonic Chord啦。」
我說：「明白。」
我按下琴鍵，返回譜架，舉起右手指揮，左手打分拍，開口先唱節奏，後唱旋律。
老師說：「夠鐘。」
我說：「唉，我唱唔晒，仲要唱得勁差。」
老師說：「唔係好差呀。」
我說：「吓？」
老師說：「基本音準節奏都準，係太慢咋嘛。」
我說：「真係？」
老師說：「係，即刻打嗰分俾你。」
我說：「咁快。」
老師說：「可以睇埋總分添。」
我說：「嘩。」
老師說：「拿。」
我說：「我竟然考試同總分都合格？」
老師說：「一開波啲小測你係肥架，不過後尾追番上黎呀嘛，繼續努力，遲早追到。」
我說：「已經日日唱，一上地鐵就唱架啦。」
老師說：「Keep住唱，唔好停。」
我說：「哦。」
老師說：「下學期難好多架，Keep住努力。」
我說：「收到。」
……
另一個我說：「究竟要唱旋律節奏到幾時呀？」
我說：「明知故問！啱啱老師咪講咗唔好停囉。」
另一個我說：「我係明知都要問呀，鬼叫嗰老師叫你唔好停呀。」
我說：「首先，我深信派老師叫我繼續唱嘅，唔係鬼，係主。」
另一個我說：「主又點？主就有權叫我哋繼續唱架啦。」
我說：「主創造得我哋出嚟，就梗係有權架啦，不過係主愛我哋，主動放權俾我哋自己揀咋，矇丙！」
另一個我說：「咁你諗住點揀？」
我說：「繼續日日唱，一上地鐵就唱。」
另一個我說：「究竟要唱到幾時？」
我說：「唱到追到。」
另一個我說：「追到之後呢？」
我說：「繼續日日唱，一上地鐵就唱。」
另一個我說：「追到之後仲要日日唱？」
我說：「追到唔代表唱得好。」
另一個我說：「點先算好？」
我說：「我作嗰啲曲，音要唱準，節奏要唱啱。」
另一個我說：「駛唔駛呀？」
我說：「我作曲嚟㗎，唔係要嗰樂手教番我轉頭，點唱自己作嗰首歌呀嘛？」
另一個我說：「喂，你越學越多，啲曲越寫越難咁點算呀？」
我說：「咁咪繼續日日同主一上地鐵，就開口唱，唱到追到為止囉。」
發表新回應