「不配得的機會，主賜就得到❓」
我需要不惜代價，盡力爭取。
…….
27/07/2023（四）17:00
另一個我說：「你作曲發佈帶咗合奏差唔多成年，自己有冇試過合奏架？」
我說：「有一次，鋼琴二重奏。」
另一個我說：「淨係鋼琴呀？其他呢？但係你作嗰4首曲，有成8種樂器，11個樂手喎。」
我說：「冇其他合奏經驗啦。」
另一個我說：「咁你諗住點呀？繼續做電腦軍師，齋作唔奏？」
我說：「唔係。」
另一個我說：「唔係，就搵合奏機會啦。」
我說：「好。」
另一個我說：「想用咩樂器奏？」
我說：「單簧管（Clarinet）。」
另一個我說：「非常好。去邊度合奏好呢？演藝（HKAPA）？」
我說：「APA唔得。」
另一個我說：「點解？」
我說：「太勁啦啲人。」
另一個我說：「咁香港國際音樂學校（HKIIM）管弦樂團？」
我說：「IIM唔得。」
另一個我說：「點解？」
我說：「Audition嘅條件要有皇家六級，我一級都冇，等我祈禱問下主點算先。」
另一個我說：「問鬼問馬咩！咪煩主啦，你冇得救架。」
我說：「我搵到啦。」
另一個我說：「搵到咩？」
我說：「香港音樂專科學校（HKMI），佢哋有個合奏訓練團，唔駛考級證書，過到Audition就得啦。」
另一個我說：「咁快啲問啦。」
…….
27/07/2023（四）17:15 香港音樂專科學校（HKMI）
我說：「你好，我想查詢一下合奏訓練團。」
職員說：「係，同學，點稱呼你呢？」
我說：「我姓葉。」
職員說：「你好，葉同學。」
我說：「我想問，合奏訓練團點樣報名參加？」
職員說：「要約Audition，Audition過到就可以即刻報名架啦。」
我說：「咁我想約Audition。」
職員說：「好，我問一問導師，再覆實你Audition嘅詳情。」
我說：「好，感謝。」
一會兒之後。
職員說：「葉同學， 你好。」
我說：「係。」
職員說：「本校合奏訓練老師許Sir回覆：8月30號星期三晚7點50分上黎Audition，到時麻煩你試奏3至6分鐘獨奏曲目或者片段，要帶備樂譜俾老師參考，有需要嘅話，會有視奏測試同埋面談。」
我說：「收到，到時見。」
……
31/08/2023（三）19:50 香港音樂專科學校
我說：「我黎Audition。」
職員說：「呢間房。」
…….
我進入房間。
許sir說：「好，葉同學。你想吹奏先？定係面談先？」
我說：「吹奏先。」
許sir說：「好，吹幾多首？」
我說：「兩首。」
許sir說：「曲名係？」
我說：「The Miller of Dee同埋Piece of Eight。」
許sir說：「黎呀。」
我吹奏完畢。
許sir說：「緊張呀？」
我說：「係呀。」
許sir說：「音準同節奏都可以。不過，一緊張就Squeak（爆音）。」
我說：「係呀，一緊張就squeak。」
許sir說：「老實，你真係好初級。而我哋嘅學員，有啲都有一定水平，所以能力唔能夠太低。」
我說：「咁即係？」
許sir說：「你學咗Clarinet幾耐？」
我說：「兩個月。」
許sir說：「兩個月？兩個月就吹到呢個程度拿？」
我說：「係呀。」
許sir說：「咁呢兩首曲你準備咗幾耐？」
我說：「一個月。」
許sir說：「呢件係你第一件學習嘅樂器？」
我說：「唔係，第一件係鋼琴。」
許sir說：「咁你音樂底都幾好，學得幾快。咁啦，我收你都得，但係要同你約法三章。」
我說：「唔？」
許sir說：「第一，你今年只能夠奏簡單嘢，複雜嘅要等你能力強咗，先會編俾你，OK？」
我說：「OK。」
許sir說：「第二，你要盡力準時出席晒所有合奏團嘅訓練。你冇經驗，每一次訓練對你黎講，都好重要。」
我說：「OK。」
許sir說：「第三，你番屋企要努力練。我會觀察住你嘅進度，如果到表演嗰陣，你都達唔到要求嘅水平，我有機會唔俾你出，OK？」
我說：「OK。」
許sir說：「都OK就出Office填報名表，交學費。九月開學，逢星期三晚，8點見。」
我說：「好。」
……
另一個我說：「你唔配呀。」
我說：「唔配咩呀？」
另一個我說：「你能力低，唔配入合奏訓練團。」
我說：「我知。」
另一個我說：「知你又交錢報名？」
我說：「許sir收，我咪報囉。」
另一個我說：「唔要面到你，一陣吹唔惦。」
我說：「我會努力練。」
另一個我說：「努力練，邊個唔識講呀？一陣你吹唔惦，喺度累街坊，正發瘟。」
我說：「吹唔惦，許sir會out我架啦。」
另一個我說：「練成年，都有機會冇得出，咁你都仲要報？」
我說：「要！我唔想一世做電腦軍師，淨係識用制譜器作曲。」
另一個我說：「咁你想做乜？」
我說：「我想做一個有親身體會，理解到樂手需要嘅作曲。呢個機會，我本來就唔配有，而家主賜俾我，許sir收我，我仲喺度嫌三嫌四，唔報呀？」
發表新回應