本週反思#273💬

「主要傳訊息，會派誰呢❓」

別設任何限制。

……..

2023年1月某天

我說：「もう一度日本語を勉強しようと思います。」

另一個我說：「中文翻譯。」

我說：「我想學番日文。」

另一個我說：「你咪已經考到日本語能力試驗N2囉，仲學？」

我說：「2010年考嗰囉喎，13年黎冇用過，咩渣都冇得剩啦。」

另一個我說：「咁唔好再嘥時間，13年黎都冇用過，即係唔會再有用。」

我說：「可能就快有用。」

另一個我說：「有咩用？」

我說：「用黎研究日本音樂。」

另一個我說：「用英文研究咪得攞，國際語言。」

我說：「英文係得，但係點及原文呀？你讀翻譯，好清楚翻譯有幾大限制架，啲嘢一經翻譯，有幾多流失咗。」

另一個我說：「學語文唔係講玩架，先唔講錢，聽寫讀講，樣樣都係時間心機，你仲有時間學咩？」

我說：「有。五月開始暑假，教三日，仲有四日。」

另一個我說：「去邊度學？」

我說：「番我母校，日本文化協會。」

另一個我說：「嗰度好麻煩，季季考試，唔合格又要重讀。你仲要學音樂架。」

我說：「我知，一個禮拜上三個鐘堂啫，每日花15-30鐘練習，應該OK嘅到時。」

另一個我說：「咩到時呀？到幾時？」

我說：「到如果演藝收咗我讀作曲，有機會研究日本音樂嗰陣時。」

另一個我說：「嘿……發完夢未？你一日未收到取錄通知，都咪當自己得呀。」

我說：「咁演藝唔收，我都可以研究日本音樂嘅啫。」

另一個我說：「跌落地仲想揦返拃沙。有冇問過主，係咪想你讀日文？有冇問過主，係咪想你研究日本音樂？」

我說：「有問過。」

另一個我說：「主答你佢想呀？」

我說：「主冇講過嘢。」

另一個我說：「我一早就知啦，自把自為。」

我說：「主係冇話想，但係主都冇話唔想喎。」

另一個我說：「你唔好包拗頸啦，乖啲啲好唔好呀？」

…….

16/03/2023（四）16:15 香港日本文化協會

職員說：「$80。」

我說：「八達通俾。」

職員說：「OK。Check email，send咗收據俾你。」

我說：「唔該。」

職員說：「4月18號，夜晚7點見。」

我說：「OK。」

…….

另一個我說：「攪咩呀？」

我說：「報名考入學試，再讀日文囉。」

另一個我說：「你係叫唔聽嗰喎。」

我說：「你老幾呀？我點解要聽你支笛呀？」

另一個我說：「我講嘢你都唔聽，我睇吓你到時點死。」

…….

24/03/2023（五）14:10 香港演藝學院A203室

最終面試結束，我準備離開。坐在最右面、一直翻閱我遞交的文件的講師，突然說話。

講師說：「唔好走住。」

我說：「係。」

講師說：「你識日文架？」

我說：「識。」

講師說：「你考到N2。」

我說：「係，不過考完十幾年冇惦過，唔記得得七七八八。」

講師說：「咁你鍾唔鍾意日本音樂？」

我說：「好鍾意。」

講師說：「有冇諗住讀番日文？」

我說：「上個禮拜報咗入學試，打算5月初讀番日文。」

講師說：「非常好，我都想叫你讀番日文，研究日本音樂，識日文方便好多。」

我說：「多謝鼓勵。」

講師說：「好啦，面試到此為止，一個月左右你會收到面試結果架啦。」

我說：「明白。」

……..

另一個我說：「呢度係邊度？」

我說：「香港演藝學院。」

另一個我說：「唔係呀嘛？我以為日本文化協會。」

我說：「癡線。」

另一個我說：「我癡？說服你去讀日文嘅，唔係應該係日本文化協會嘅職員咩？」

我說：「你梗係癡啦，硬係鍾意用自己嘅想像限制主。」

另一個我說：「喂，唔係……」

我說：「主今日就係，派咗香港演藝學院作曲系嘅講師，喺Final Audition嘅尾聲，鼓勵我重讀日文，準備研究日本音樂，咁點呀？」