「目擊不幸，你會出手協助嗎❓」
若早知是他本人的責任，我會由他自行承擔。
…..
05/01/2022（四）08:20 家
我說：「皮皮。」
皮皮跑來，我繫上狗帶，執拾行裝，準備出門晨運。
爸爸說：「皮皮。」
爸爸起來，說：「哇！」
我說：「晨早流流，咁大聲做乜呀？」
爸爸說：「你睇下。」
我說：「咩嚟？」
爸爸說：「你隻貓啦。」
我說：「筒筒？唔好老屈喎？」
爸爸說：「尋晚皮皮同你阿媽喺大房瞓，你喺細房瞓，得我同筒筒喺廳鋪地咋。唔係筒筒，唔通係你夢遊走出嚟嘔落我張被度咩？」
我說：「噢…….喺喎，原粒糧嘔出嚟。」
爸爸說：「攞條毛巾出嚟幫手抹啦。」
我說：「我睬你都傻。」
爸爸說：「咩話？」
我說：「你自己攞嚟嘅。叫咗唔好筒筒一過嚟搵你，你就搏老命係咁餵嘢俾佢食，餵到佢消化唔切，成粒糧嘔番出嚟。而家啱啦，嘔晒落你張被度，成張被都係，你自己食番佢。」
爸爸看著我。
我說：「皮皮，行。」
我出閘關門。
……
另一個我說：「係咪咁樣做仔呀？」
我說：「你見到我係點咪係點囉。」
另一個我說：「正衰仔，係咪咁樣做基督徒呀？」
我說：「乜你見唔到我冇理老竇，直出門口嘅咩？」
另一個我說：「鄰舍都要幫啦，何況係老竇？」
我說：「我而家咪幫緊佢囉。」
另一個我說：「你邊隻手幫緊佢呀？佢叫你攞條毛巾出嚟幫手抹呀！」
我說：「我都唔係用手幫佢，我用腳幫佢。」
另一個我說：「你點用腳幫佢呀？」
我說：「我行出門口，走人囉。」
另一個我說：「你咁叫做幫呀？筒筒你買架，你一啲責任都冇咁！」
我說：「筒筒嘔咗咁耐，我俾錢帶佢去睇醫生，再俾錢買埋腸胃藥同益生菌，仲親手餵埋，率之好番而家食住益生菌都仲有本事再嘔，我先叫懷疑佢餵過龍，叫佢停餵，唔聽。我有我叫，佢有佢餵。」
另一個我說：「咁你就由得嗰老竇自生自滅囉喎？」
我說：「我唔由得佢自己承擔番自己嘅責任，乜你認為佢會反思較正咩？」
另一個我說：「你憑咩話佢唔會？」
我說：「佢有較正停止狂餵嘅，點解頭先筒筒嘔，我話佢，佢唔駁我呀？」
另一個我說：「我唔駛你呢啲冷血基督徒幫，我祈禱搵充滿慈愛嘅主求助。」
我說：「你想求主幫咩？」
另一個我說：「幫你老竇善後呀，發瘟仔！」
我說：「好呀，你慢慢求。」
另一個我說：「咁你做乜？」
我說：「頭先主都冇阻止筒筒嘔落老竇張被度囉，我仲唔把握機會要佢自己食番佢自己一手泡制嗰啲蘇州屎呀？你咁有善心，係鍾意幫呢啲人承擔責任呀嘛，我唔阻你。係咁走先，拜拜唔駛送。」
發表新回應