「成長，從何開始❓」
坦露自己，改變自己。
…….
13/12/2022（二）12:15
LMusTCL課堂
老師說：「報咗演藝未？」
我說：「報咗啦。」
老師說：「咁繼續LMusTCL。」
我說：「好。」
老師說：「今個禮拜做咗啲乜？」
我說：「Orchestration（配器法）。」
老師說：「哦。」
我說：「其實都唔係好知點做，不過我都攪咗幾個鐘做晒佢。」
老師說：「你呢個態度正確，學作曲咁先有進步。」
我說：「嗯？」
老師說：「我就係要睇到你錯邊度，先知教邊度最有效。」
我說：「嗯。」
老師說：「好多學生一遇到少少問題，就唔諗嘢，懶；唔試，怕錯。拖拖拖，拖到最後俾番條問題我，咁樣學作曲係唔會學得好。」
我說：「嗯。」
老師說：「好，開你嗰Orchestration黎睇吓。」
我說：「嗯。」
我打開總譜。
老師說：「嘩，都錯得好緊要喎。」
我說：「哈哈，請指教，我逐樣改。」
…….
我說：「每個禮拜六Zoom查經嗰陣，都有啲反思問題，你有冇答架？」
另一個我說：「梗係冇啦。」
我說：「點解？」
另一個我說：「答錯點算？」
我說：「錯咗咪認，認完咪改囉。」
另一個我說：「唉……其實有時係唔知答乜好。」
我說：「最叻轉移話題…..唔知答乜好，咪用個腦諗吓囉。」
另一個我說：「唔想諗，好累。」
我說：「懶到出血，你番豬欄等劏啦。」
另一個我說：「就算我真係諗，有時都係乜都諗唔到。」
我說：「咁你咪答，我暫時乜都諗唔到囉。」
另一個我說：「唔制，拖吓先。」
我說：「拖到幾時？」
另一個我說：「拖到有人答啱，我咪唔駛答。如果點名問到我，我抄佢，就實冇死，仲慳水慳力。」
我說：「正一垃圾，你咁樣做，咪永遠睇唔到自己嘅真面目係點囉！點成長呀？」
另一個我說：「我諗到乜即刻答乜，咁咪遲早穿煲，俾全世界知道，我只係掛名信主10年嘅資深基督徒，實質係空殼公司囉。」
我說：「咁你實質係空殼公司嘅，就要認架啦。」
另一個我說：「咁樣唔要面，坦露自己，唔係我一貫嘅作風，唔係我自己。」
我說：「唔係你一貫嘅作風，唔係你自己就好啦。」
另一個我說：「仲好？我個人根本就唔係咁，咁樣唔要面主動直接、冇遮冇掩、即時答問題法，咪冇晒我自己囉。」
我說：「呢個一直阻住你進步嘅自己，即舊我，你死攬住黎做乜嘢呀？主唔係一路都叫我哋捨己嘅咩？你究竟係咪信主架？」
另一個我說：「我…自己……」
我說：「唉，你唔信就過主呀，咪阻住我做Orchestration（配器）。」
發表新回應