「承諾，你會兌現多少❓」
完全，因為主先完全兌現承諾。
…….
26/11/2022（六）08:00 家
我換上裇衫西褲，準備出門。
媽媽說：「番工呀？」
我說：「梗係，唔番工，唔著老西啦。」
媽媽說：「番幾點？」
我說：「9點半。做乜？」
媽媽說：「講兩句。」
我說：「講。」
媽媽說：「俾多一千蚊黎。」
我說：「點解呀？啱啱先過咗家用俾你咋喎，老豆筆面癱針灸費我都找埋啦。」
媽媽說：「就係老豆嗰度差一千蚊。」
我說：「我過咗一萬零四百俾你架，打簿啦。」
媽媽說：「唔係，條數係一萬一千四百先啱。」
我說：「你又話一萬零四百？」
媽媽說：「我計錯數，有單架。」
媽媽拿出單據。
我說：「係喎。」
媽媽說：「你話老豆肯去針灸醫面癱，錢你出晒嗰喎。咁而家呢一千蚊你俾唔俾先？」
我沉默一下，看看媽媽。
我說：「俾。」
媽媽說：「咁得閒過數俾我啦。」
我走入房間，拿出兩張五百元紙幣。
我說：「一千。」
媽媽說：「駛乜咁急呀又？」
我說：「講過就係。即刻兌現承諾，找晒條數佢，唔好咩？」
媽媽說：「好，非常好。」
……
另一個我說：「好疊水呀你？」
我說：「疊水就唔駛周圍撲水，趕交租，俾家用，交學費啦。」
另一個我說：「唔疊水又俾得咁爽？窮鬼充富豪！」
我說：「我假假地都係大專講師嚟架，一千蚊都攞唔出，有冇人信呀？」
另一個我說：「但係嗰一千蚊點解係要你找埋佢啫？你阿媽同埋阿妹唔識你老豆架？分擔下都好應該啫！」
我說：「但係呢單嘢話出晒錢嗰個，唔係佢哋，係我喎。」
另一個我說：「你係咁講過，不過….」
我說：「不過主話我知，佢想我完全兌現承諾，找晒條數佢。」
另一個我說：「主派邊個話你知呀？摩西呀？」
我說：「話我知嗰個勁過摩西！」
另一個我說：「吹大啲呀你！你乜水呀？大專講師好巴閉呀？周街都撞到三五七個啦，仲夠膽死話有個勁過摩西嘅黎同你講嘢？講啦，佢邊位呀？」
我說：「主自己囉。主喺聖經講過話承諾拯救我哋，贖晒我哋所有嘅罪；只要我哋真心信靠佢為救主，同埋生命嘅主，就必得救。有走過數咩？」
另一個我說：「主真係冇走數？」
我說：「主耶穌親自降世上十字架犧牲埋自己啦喎。你走數咋？」
另一個我說：「我點會走數？我2009年已經決志宣告，承諾真心真意信靠耶穌為我嘅救主同埋生命嘅主，餘生分分秒秒、無時無刻追隨耶穌，不離不棄，2012年2月領埋洗添啦，領洗證書仲喺度，駛唔駛俾你過吓目？」
我說：「咁你承諾追隨嘅主耶穌，今日安排俾你嘅責任，你盡力全部完成晒佢未呀？定係走咗數？」
另一個我說：「……」
發表新回應