本週反思#255💬

「主資助，如何找到❓」

見一步，試一步。

…….

05/11/2022（六）22:00 新城工商中心

Logic Pro X課堂

我正學習如何為自己的音樂作品混音。

我說：「Logic嗰EQ得5點，但每件樂器有成幾十點要執，點攪呀？」

老師說：「開多幾個EQ逐點執。」

我說：「要開幾多個EQ先夠？」

老師說：「如果成首曲每件樂器有100點要執嘅，咁咪100除5，開20個EQ。」

我說：「嘩，淨係我首Jazz都有7件樂器，咁咪一首曲開成140個EQ？」

老師說：「啱。」

我說：「但係要關咗第一個EQ，先開到第二個EQ，咁我點知我第二個會唔會執過龍，影響第一個EQ架？」

老師說：「用耳仔聽。」

我說：「耳仔訓練未夠，聽唔到呢？」

老師說：「熄咗第二個EQ，開番第一個EQ黎睇囉。」

我說：「咁咪好廢時失事？」

老師說：「無錯。所以我學識咗Logic嗰EQ，即刻唔用。」

我說：「唔用Logic嗰EQ，咁你用咩？」

老師說：「Fabfilter。」

老師打開Fabfilter嘅主頁。

我說：「嘩，咁多混音軟件嘅？」

老師說：「呢個Plug-in好powerful架，我混音都用佢，淨係嗰EQ已經有無限點，又夠sensitive ，開一個EQ就攪惦晒。」

我說：「嘩。」

老師說：「你考慮吓買番一個，最好買Total Bundle，買晒成套番黎逐套學。」

……

07/11/2022（一）22:00 Band 房

另一個我說：「Total Bundle幾多錢？」

我說：「$899英鎊。」

另一個我說：「即係港紙幾多？」

我說：「而家英鎊對港紙係 $1 對 $9.1，即係HK$8,180。」

另一個我說：「嘩，咁咪差唔多又駛成萬？」

我說：「喂，咪住。」

另一個我說：「點呀又？5餅2魚，啲錢越洗越多呀？」

我說：「錢冇多到，但係有音樂學生優惠，申請開音樂學生帳戶，獲批就可以半價買到。」

另一個我說：「人哋係英國公司黎架！」

我說：「英國公司又點？」

另一個我說：「最弊你係慈雲山音樂學校嘅業餘兼讀制作曲文憑二年級生咋，鬼識你呀？邊個會騷你呀？嘥心機！」

我填妥資料，掃描音樂學校學生證，按鍵提交申請。

另一個我說：「喂，你撞聾呀？自把自為，當我發噏風。」

…….

08/11/2022（二）17:50 香港國際音樂學校辦公室

我坐著等待六點正的鋼琴課，副校長走過。

副校長說：「封推薦信寫好啦，攞咗未？」

我說：「未，而家攞。」

我從行政接過推薦信。

副校長說：「睇吓寫成點。」

我讀了推薦信一篇。

我說：「寫得好好，非常感謝。」

……

08/11/2022（二）20:30 香港國際音樂學校310室

合唱團練習中場休息，電話顯示Fabfilter傳來電郵。

Fabfilter說：「感謝你申請學生帳戶。你可唔可以再寄多少少資料俾我哋睇，證明你今年音樂學生嘅身份？」

另一個我說：「人哋唔認你呀，收擋啦，慈雲山音樂學校嘅業餘兼職制作曲文憑二年級生。」

我說：「推薦信！有寫我今年讀作曲第二年。」

另一個我說：「喂，撞聾呀你，都話唔認你囉。」

我掃瞄推薦信，寄給Fabfilter。

……

08/11/2022（二）23:26 Band房

Fabfilter傳來電郵。

另一個我說：「收擋啦你。」

我打開電郵。

Fabfilter說：「感謝你提供進一步嘅資料，現已為你開設學生帳戶，歡迎你隨時購買我哋嘅電腦混音外掛程式，並享有半價優惠。」

另一個我說：「咩話，幾多折話？」

我說：「半價，即5折。」

另一個我說：「咩話？英國公司竟然承認你呢個慈雲山音樂學校嘅業餘兼讀制作曲文憑二年級生，幫你開學生帳戶，俾你享用半價優惠？」

我說：「做乜？唔抵得呀？難怪你嘅，你都唔信主。」

另一個我說：「我邊有唔信主呀？」

我說：「你信，咁你做乜唔叫我去努力嘗試，係咁叫我去收擋呀？」

另一個我說：「你誤會咗，我唔係咁嘅意思，我…」

我說：「收擋啦你。」

我以半價購入Fabfilter Total Bundle。