「鄰舍愛鄰舍，如何鼓勵❓」
接受主的愛，除去自身的嫉妒，讓鄰舍無阻隔地表達愛。
……
13/11/2022（日）14:00 家
學生告假。
媽媽說：「學生請假？」
我說：「係呀。」
媽媽說：「咁陪我去KFC食蘑菇飯。」
我說：「行得未？3點有學生。」
媽媽說：「行。」
…..
13/11/2022（日）14:15 KFC, APM
我在自助點餐機下了單，坐下等待。
媽媽說：「知唔知你老豆發癲呀？」
我說：「唔知喎。」
媽媽說：「知唔知你老豆為咗邊個發癲呀？」
我說：「唔知喎，為咗你呀？」
媽媽說：「為咗你呀。」
我說：「為咗我？唔係呀嘛。」
媽媽說：「係呀。」
我說：「嘩，我唔知喎。」
媽媽說：「你梗係唔知啦，一日到黑都唔喺屋企，佢而家唔係對住你癲，佢對住我癲呀。」
我說：「點癲法？」
媽媽說：「你阿妹番黎咪燉湯俾佢飲嘅。」
我說：「喂，燉咗好耐嗰囉喎，癲咩呀仲？」
媽媽說：「上次燉湯俾你嗰妹嗰陣，阿峰喺隔離，咪叫佢飲兩啖試吓囉。」
我說：「跟住呢？」
媽媽說：「跟住阿峰話好飲，我咪話下次佢過嚟，燉埋俾佢好唔好？嗰陣你都喺度架！」
我說：「哦，係咩？咁阿峰點講？」
媽媽說：「阿峰話好，咁之後阿峰過嚟，我咪燉埋俾佢飲囉。」
我說：「咁跟住呢？」
媽媽說：「燉得一兩次之後，你老豆就癲啦。」
我說：「癲咩？」
媽媽說：「佢話成日燉埋俾阿峰，咁我嗰仔飲咩？」
我說：「哈哈，關心我呀？難以置信喎！佢當年粒聲唔出離家出走十幾年冇晒影問候都冇一句，突然轉死性？」
媽媽說：「自從你攪惦佢嗰面癱，就成日因為你癲啦。」
我說：「喎，係我叫佢睇醫生，仲要我俾埋晒錢架。不過其實，醫老豆塊面嗰個中醫，係主派啲教友介紹嘅。」
媽媽說：「佢仲話我淨係顧住關心阿峰，自己嗰仔唔駛理。」
我說：「咁你點答佢？」
媽媽說：「我話我個仔好大方，絕對唔會介意我關心阿峰多啲。」
我說：「我冇講過我唔介意喎，你點知架？」
媽媽說：「睇你啲反應就知啦。你啲反應好自然嘅，我問阿峰燉湯好唔好飲，你冇表現唔開心；燉埋俾阿峰飲，你都冇表現唔開心；一去攪你嗰啲音樂就鬼死咁開心。」
我說：「哦，主帶領我過緊嘅音樂生活實在夠晒開心，完全冇需要爭風呷醋。你關心阿峰多啲咪幾好。」
媽媽說：「所以我咪唔理你老豆，照燉湯俾阿峰囉。」
我說：「你照燉湯俾阿峰，老豆咪發癲，咁你點覆佢？」
媽媽說：「我同佢講，我嗰仔根本一啲都唔介意我關心多啲阿峰，我仲醒多咗佢一句添。」
我說：「醒多咗一句咩？」
媽媽說：「我嗰仔唔係你呀！」
我說：「哈哈，絕呀！我真係唔係佢。我同佢最大分別就係，我信耶穌，充滿愛。支持你，繼續關心佢哋多啲，燉多啲湯俾佢哋飲。」
發表新回應