「福音，如何廣傳❓」
我傳，你又傳。
……
10/10/2022（一）13:00 浸大導師休息室
我在休息室正中的長檯，坐下來。背向我看著電腦的同事突然轉身……
同事說：「我睇咗你個見證。」
我說：「你喺邊度睇咗我嘅見證？」
同事說：「YouTube。」
我說：「YouTube？冇理由架？我都冇send過條Link俾你，其實我連你電話都冇。」
同事說：「你同事send俾我架。」
我說：「我同事？」
同事說：「Edith呀。」
我說：「哦。Edith有你電話呀？」
同事說：「佢冇我電話。」
我說：「佢冇你電話，點send俾你呀？」
同事說：「佢問其他同事。」
我說：「咁迂迴？」
同事說：「係呀。真係好有心，佢仲提我如果欣賞，就Like，同share出去添。」
我說：「嘩，咁積極。」
……..
另一個我說：「你同事Edith搏咩？」
我說：「搏咩？搏命傳福音囉。」
另一個我說：「駛唔駛呀？問A同事搵B同事聯絡方法，就係為咗傳你嗰條爛鬼片。」
我說：「爛鬼片？呢條我刻意反思信主至今嘅帶領，專登寫晒稿，搵埋嗰教友一齊開Zoom錄影，自己配埋音樂，再搵另一個教友設計埋嗰Opening嘅見證短片黎片。」
另一個我說：「知你俾心機，睇到你為主做見證，認同你嘅努力，不過就算係都唔駛咁大陣仗呀？好忙架我！」
我說：「咁又大陣仗，咁點先合適呀？」
另一個我說：「欣賞嘅，Like吓，Share吓俾身邊嘅人咪得囉。」
我說：「咁你欣唔欣賞？」
另一個我說：「點會唔欣賞呀？主嘅帶領喎，你又咁俾力。」
我說：「咁欣賞，咁你有冇Share出去？」
另一個我說：「梗係冇啦。無啦啦Share條片，一陣人哋唔知以為我想做乜？」
我說：「冇Share，咁有冇Like？」
另一個我說：「梗係冇啦。一陣俾人睇到我Like點算？佢哋會點睇我呀？我同你心照不宣。」
我說：「你同我有咁遠死咁遠！就係有你呢啲有我傳，冇你傳，連你自己都認同欣賞嘅，都心照不宣嘅人成日喺我隔離，唔怪之得主嘅福音傳黎傳去都傳唔出去啦。」
另一個我說：「你要我行開咁遠，主嘅福音就傳到出去啦？」
我說：「我而家要去搵一啲我傳佢又傳嘅人呀，咁福音咪傳得出去囉，借過啦。」
......
發表新回應