「主準備的機會，你有多渴求呢❓」
越渴求，求問越進取。
…….
11/04/2025（四）1800 香港演藝學院
另一個我說：「喂，你作嗰首嘢，幾時演？」
我說：「5月9號。」
另一個我說：「埋好班未？」
我說：「未。」
另一個我說：「仲未？你得番一個月時間咋喎，仲未搵到？」
我說：「搵到Violin（小提琴）、Saxophone（色士風），同埋Vibraphone（顫音琴）。」
另一個我說：「差咩？」
我說：「差Cello（大提琴），Conductor（指揮）同埋Percussion（敲擊）。」
另一個我說：「仲搵唔到咁點？」
我說：「老師話寫過佢。」
另一個我說：「你二月寫到而家嗰囉喎。」
我說：「一諗到要寫過，我都想死。」
……
11/04/2025（四）1800 香港演藝學院圓形劇場
作曲系多媒體音樂表演結束。
同學說：「你Major係咪搵緊Cello？」
我說：「係呀。」
同學說：「搵到未？」
我說：「未，想死。」
同學說：「台上咪有一枝囉。」
我說：「下？人哋啱啱表演完，我咁樣衝落去問。」
同學說：「電話問，成功率低好多。」
我說：「我唔想做癡漢呀。」
同學說：「搵唔到，你準備重寫。」
我說：「點解會搵唔到？」
同學說：「5月9號，西樂Cello去晒School Musical，冇人得閒，而家台上中樂Cello你又要拖。」
我說：「咦，嗰Cello去咗邊？」
同學說：「啱啱走咗入後台啦。」
我離開座位，衝向後台，攔截演奏Cello同學。
……
我說：「你好，我喺Yip，作曲系二年級。」
Cello同學說：「係。」
我說：「我想邀請你，幫我喺嚟緊作曲音樂會，演奏我嘅作品。」
Cello同學說：「幾時？」
我說：「5月9號，晚上6點30分。」
Cello同學說：「邊度？」
我說：「音樂廳。」
Cello同學說：「好，冇問題。」
……
另一個我說：「你條癡漢呀！」
我說：「我只不過係直接啲求問啫。」
另一個我說：「直接到急步衝上台，野生捕獲式攔截喎，一啲基督徒應有嘅儀態都冇。」
我說：「咩基督徒嘅儀態呀仲？我首嘢就嚟要重寫，想死啦，仲儀態？」
另一個我說：「你條癡漢！」
我說：「癱子想耶穌幫，搵朋友拆屋頂，對準位，連墊直接縋佢落去耶穌度都得啦。我而家把握主預備嘅機會，等表演完，先衝上台當面攔截大提琴同學，進取得黎都好溫和咋喎。」
發表新回應