「主若直接給你意念，你信嗎❓」
若相信，會嘗試。
……
14/09/2024（六）1600 香港專科獸醫醫院
筒筒檢查完畢，醫生確認發現心臟再次變肥，積水增多。
我在櫃枱付款之後，轉身離開之際……
我說：「我突然間有個諗法。」
另一個我說：「咩諗法？」
我說：「筒筒心臟情況突然又惡化番，會唔會係有嘢做錯咗呢？」
另一個我說：「唔會。」
我說：「你又知？」
另一個我說：「專科醫生話可以冇原因，而家連專科醫生都搵唔到有咩原因。」
我說：「我都未同專科醫生講，我呢段時間做過啲咩。」
另一個我說：「仲有咩要講？你都冇新嘢做過。」
我說：「有，筒筒最近喺普通科睇咗牙同鼻。」
另一個我說：「你禱告問吓主先啦。」
我說：「主知道發生緊咩事架。」
另一個我說：「我唔知你發生緊咩事呀，乜主有同你講過嘢咩？」
我說：「我啱啱咪話突然間有個諗法：筒筒心臟情況突然又惡化番，會唔會係有嘢做錯咗呢？」
另一個我說：「冇囉都話，發神經，諗到就當真，最叻俾麻煩人。」
…….
我轉身面向櫃枱。
我說：「有件事想勞煩你幫幫手。」
護士說：「咩事？」
我說：「我想俾醫生睇吓，上次覆診到今日為止，筒筒食過嘅嘢同用過嘅藥。」
護士說：「醫生叫你咁做？」
我說：「唔係，我懷疑當中可能有筒筒心臟再次肥大積水嘅原因。」
護士說：「醫生冇同你講過有懷疑。」
我說：「唔係醫生懷疑，係我懷疑。」
護士說：「咁你攞啲食物同藥出嚟，我影相俾醫生睇。」
我說：「我直接send相俾你。」
護士說：「OK。」
我傳送相片給護士，再轉寄給醫生。一會兒過後….
護士說：「醫生話，普通科開俾筒筒渣唇瘡嘅藥有類固醇，最好立即停用，因類固醇同心臟藥極有可能相衝。」
我說：「感謝話我知。」
護士說：「你同普通科講，叫醫生開過第二隻冇類固醇嘅唇瘡藥啦。」
我說：「收到。」
……
28/09/2024（六）1347 WhatsApp
妹妹傳來短訊。
妹妹說：「筒筒情況有好轉，積水減少，藥劑量輕微調節，要清埋餘下積水，下個月尾再檢查睇下清唔清得哂。」
我說：「收到。」
……
另一個我說：「你再祈禱求吓主添啦。」
我說：「仲要求乜呀？筒筒唔咪已經有好轉呢咩？」
另一個我說：「你一求，主就醫筒筒，筒筒就好轉啦；你再求，話唔埋……」
我說：「你點知我求，主先醫筒筒呀？」
另一個我說：「我睇到係咁。」
我說：「我睇到嘅淨係，主真接俾嗰意念我，你都唔信啫。」
另一個我說：「我冇唔信。」
我說：「信你又唔試？」
另一個我說：「唔係呀，我嗰陣唔試係因為……」
我說：「咪就係因為，你唔信囉。」
發表新回應