本週反思#262💬

「成功的里程碑，如何尋見❓」

每天一心一意，竭盡全力隨主前行探索。

……

07/01/2023（六）16:00 家

手機響起。

我說：「喂……」

行政說：「喂，葉偉雄。」

我說：「Karen（香港國際音樂學校行政主任）。」

行政說：「係呀，得唔得閒講兩句？」

我說：「請講。」

行政說：「恭喜你，獲選得到獎學金。」

我說：「獎學金？」

行政說：「係呀，獎學金。」

我說：「嘩，我未攞過獎學金架。」

行政說：「咁你而家咪攞吓囉。」

我說：「我點獲選架？」

行政說：「平均成績高過3.5。」

我說：「Yeah，超級勁開心。」

行政說：「學校仲有封獎學金證明信俾你。」

我說：「有獎金不突止，仲有獎品？」

行政說：「你可以用嚟申請APA（演藝）。」

我說：「正，封信幾時有得攞？」

行政說：「下個禮拜，番學校搵我攞。」

我說：「OK。」

……

另一個我說：「唉，真係天冇眼。」

我說：「知你唔抵得我架啦。」

另一個我說：「你又知？」

我說：「你無膽懶惰怕事怕人怕付出，咩成功機會都俾你自己封殺晒啦。你一事無成，梗係唔抵得我學有所成架，可以理解嘅。」

另一個我說：「我祈求主立即降雷劈死你。」

我說：「主開思，我未死。」

另一個我說：「呢篇反思唔係講我，係講你，講番你先。」

我說：「好，講我。」

另一個我說：「你唔係音樂世家。」

我說：「啱呀。」

另一個我說：「音樂，你唔係由細學到大，輸在起跑線。」

我說：「啱呀。」

另一個我說：「你三年前仲係音樂聾啞人士，啲音同節奏，聽又聽唔到，唱又唱唔準。」

我說：「啱呀。」

另一個我說：「你好鬼老，30幾歲人先黎入校學音樂，咩天份都退化晒。」

我說：「啱呀。」

另一個我說：「你經濟基礎唔穩陣，學音樂今日唔知聽日事，搵嗰啲錢左手黎，右手去。」

我說：「啱呀。」

另一個我說：「唔啱！咁都俾你攞到獎學金！」

我說：「啱，呢個係我日日與主同行嘅合理結果。」

另一個我說：「淨係得你識與主同行呀？我夠識囉。」

我說：「但係我唔聽見你分享過與主同行嘅經歷嘅？有日日與主同行嘅，生命總有一啲改變架？牛頭角站行過去觀塘站，嗰景都唔同啦，見到APM。」

另一個我說：「呢篇反思唔係講我，係講你呀，講番你先。」

我說：「好，講我。」

另一個我說：「你點與主同行法？」

我說：「第一，我每日一心一意與主同行。」

另一個我說：「點樣每日一心一意法？」

我說：「每朝訓醒，嗰腦就係諗主同音樂。」

另一個我說：「有第一，即係有第二啦。第二呢？」

我說：「第二，我竭盡全力與主同行。」

另一個我說：「點樣竭盡全力法？」

我說：「一放工，即刻同主番音樂學校，學習音樂；一放學放假，就同主番Band房，研究音樂。付出難以估計嘅時間心機，有血有汗架。」

另一個我說：「哦……叻晒啦而家。」

我說：「我知我叻，不過叻嘅唔止我一個，仲有其他同學攞到獎學金嘅。」

另一個我說：「唔識人啦。」

我說：「個個月同我一齊預備黎緊下學年初作曲發佈會嗰班唔係人黎架？我直情要不停主動結識唔同嘅人添啦，作曲冇樂手，搵鬼幫我奏呀？」

另一個我說：「唔駛行，曉飛啦。」

我說：「梗係要行！我一直都隨主前行，唔腳踏實地，學唔成音樂，我打算學到番天家。」

另一個我說：「都攞到獎學金，搵到成功嘅里程碑囉，仲要隨主前行？」

我說：「梗係要繼續隨主前行探索啦，仲要保持每日一心一意，竭盡全力，因為我深信，主一早預備咗下一個更大嘅里程碑，等緊我同佢一齊去發掘架，黎呀。」

另一個我說：「咪住，下一個里程碑係咩先？」

我說：「企係度唔郁永遠搵唔到架，行啦。」