本週反思#236💬

「當天撇下一切隨主起行，如何見證❓」

今日的成果。

……

12/07/2022（二）11:45 家

我回家。

媽媽說：「喂，有封嘢寄俾你。」

我說：「有封嘢寄俾我？」

媽媽說：「係呀。我今朝去街市買菠蘿，番黎嗰陣管理處阿高佬俾我嘅。」

我說：「高佬俾你？」

媽媽說：「係呀，高佬話有個郵差專登送過嚟，拜托佢俾你嘅。」

我說：「點解要拜托高佬？」

媽媽說：「高佬話，嗰郵差講封嘢唔摺得，唔可以放落個信箱。」

我說：「哦，封嘢係邊？」

媽媽說：「你間房度。」

……

我打開房門，看見一封未拆開的郵件，把它拆開。

另一個我說：「咩黎架？」

我說：「證書。」

另一個我說：「咩證書？」

我說：「寫住Associate of Trinity College London - Level 4 Diploma in Music Theory。」

另一個我說：「覺得點？」

我說：「非常興奮。」

……

12/07/2022（三）07:46 Maggie移家講耶穌WhatsApp群姐

我把證書上傳至群組。

我說：「大家，早晨，昨晚凌晨回家，收到英國倫敦聖三一音樂學院樂理文憑考試的證書，心情十分興奮，今早禱告再看證書，感覺興奮未止，想跟大家分享喜悅。」

……

13/07/2022（三）08:00 華漢茶餐廳

媽媽說：「尋晚嗰封咩黎架？」

我拿出手機，展示相片。

我說：「你自己睇吓。」

媽媽說：「我都唔識英文。」

我說：「睇吓先講啦！你話你有小學畢業程度架嘛，總有一隻字識架。」

媽媽仔細看看。

媽媽說：「London，倫敦，即係英國約翰遜嗰度啦。」

我說：「啱。成日顧住約翰遜。」

媽媽說：「Music，音樂。哦，你成日攪嗰擋嘢呀？」

我說：「係呀。」

媽媽說：「其他唔識啦，咩黎？」

我說：「係英國倫敦聖三一音樂學院樂理文憑考試證書。」

媽媽說：「吓？英國音樂考試？」

我說：「係呀。」

媽媽說：「你考咗幾多鑊？」

我說：「一次。」

媽媽說：「你一鋪過考到呀？」

我說：「正確。」

媽媽說：「冇幾耐之前，你連彈首歌都彈唔惦。」

我說：「嗰陣已經係兩年前嘅事啦，不過呢張證書係樂理文憑考試，唔係演奏考試。」

媽媽說：「都係啫，你都冇音樂細胞，我哋又唔識培養，你仲要成咁嘅年紀，先走去學人吹啲打，考到不突止，仲要一鑊過！有冇攪錯呀？」

我說：「冇攪錯，證書為據。」

媽媽說：「嘩，兩年咋喎，發生啲咩事？」

我說：「你唔記得兩年前發生咩事啦？你親身見證嗰喎！」

媽媽說：「兩年前發生咩事？」

我說：「準確啲黎講，係一年零九個月之前，即2020年10月，我唔理你哋大力反對，跟隨主去報讀香港國際音樂學校學音樂，呢個咪就係我同主同行，好努力學音樂嘅其中一個成果囉。」