「如何接受自己❓」
不斷讓主讓人讓自己，看清真實的自己。
…….
2022/02/01（二）09:30 鍘魚涌
一年一度高中同學和中文哲學老師的行山聚會。
同學和老師討論自己聲線的問題。
我說：「其實我都好怕聽番自己把聲。」
老師說：「你點知？」
我說：「視唱練耳課，錄完自己唱嘅旋律，自己都唔想聽番。」
舊同學說：「你又係咁，我都係咁，覺得自己把聲好難聽。」
老師說：「有幾唔想聽自己把聲？」
我說：「錄完音，一次都唔想㩒黎聽。」
老師說：「咁唔聽呀？」
我說：「聽，都要聽下自己有冇走音架嘛。」
老師說：「自己聽完，有冇俾其他人聽？」
我說：「有，要send俾老師聽，要交功課。」
老師說：「淨係俾老師聽？」
我說：「唔止，send開咪send埋俾啲朋友同學聽，想聽下佢哋嘅意見。」
老師說：「咁之後自己有冇再聽？」
我說：「有，收到意見再聽，想睇吓佢哋嘅意見係咪真嘅，係真嘅再唱嗰陣就要留意吓。」
老師說：「聽聽下，覺得自己把聲點呀？」
我說：「唔係我想像中咁難聽。」
老師說：「咁繼續聽，可能會發生一啲更微妙嘅變化。」
我說：「嗰啲更微妙變化，係咪會覺得自己把聲幾好聽？」
老師說：「係呀，你有咁覺得呀？」
我說：「近期有。」
老師說：「咁繼續聽。」
…….
另一個我說：「我好討厭真實嘅自己，點算？」
我說：「咁俾人睇吓你真實嘅自己係點。」
另一個我說：「我真實嘅自己，我都話自己都討厭囉，仲俾人睇，一般人接受唔到架。」
我說：「咁俾基督徒睇吓你真實嘅自己係點。」
另一個我說：「我真實嘅自己，如果俾嗰啲法利賽基督徒睇到，就仲死！一係就捉我去浸豬籠，唔係就用石頭鑑生砸死我。」
我說：「咁俾主睇吓真實嘅你係點啦。」
另一個我說：「我真實嘅自己，主完全聖潔，點會接受到呀？」
我說：「主接受到。」
另一個我說：「我真實嘅自己，好醜陋架。」
我說：「再醜陋，主都一定接受到。」
另一個我說：「你係主呀？」
我說：「主就係為咗贖我哋呢啲咁醜陋嘅罪而死架嘛，肯自願犧牲都接受唔到呀？」
另一個我說：「吓，咁如果我想接受自己嘅話…」
我說：「咁就首先俾主睇吓你真實嘅自己係點啦，跟住……」
另一個我說：「跟住？」
我說：「跟住就俾你自己睇吓你真實嘅自己係點，再跟住……」
另一個我說：「再跟住？」
我說：「再跟住就俾人哋睇吓你真實嘅自己係點啦。」
另一個我說：「仲有冇再再跟住？」
我說：「再再跟住，就係繼續俾主，俾自己，俾人哋繼續再睇吓你真實嘅自己係點。」
另一個我說：「再再再跟住，我就開始接受自己啦。」
我說：「正確。」
另一個我說：「點解？」
我說：「因為有一日睇清睇楚嗰陣會發現，原來真實嘅自己未必係自己想像中咁醜陋，繼續睇嘅話更可能會…」
另一個我說：「更可能會點呀？」
我說：「更可能會發生一啲更微妙嘅變化。」
另一個我說：「嗰啲更微妙變化，係咪我會喜歡自己？」
我說：「係呀。」
另一個我說：「點解？」
我說：「睇到自己都接受到真實嘅自己係咁嗰陣，係會好想跟隨主改變，改到自己都鍾意自己架嘛。」
發表新回應