本週反思#212💬

「舊我，為何陰魂不散❓」

阻礙我今天跟從主的，可能還未捨棄。

…….

24/01/2022（一）07:00 家

我開門，皮皮步入，媽媽起床。

媽媽說：「咁早嘅！同皮皮晨運完啦？」

我說：「係呀，今朝新課程第一堂，想早少少番大學預備。」

媽媽說：「哦。」

我抱起皮皮，抹身。

我說：「咦，皮皮背脊又生咗幾粒瘡，係咪食醫生新開嗰啲關節藥敏感？都係影副相，星期六覆診同醫生講。」

媽媽說：「唔駛影，都唔關啲藥事！」

我說：「咁關咩事？」

媽媽說：「關啲糧事。」

我說：「有買新糧咩？」

媽媽說：「之前食剩一包魚味糧，我見皮皮日日食雞味糧咁悶，咪添啲魚味糧俾皮皮囉！」

我說：「咁都唔肯定係關魚味糧事架！」

媽媽說：「你睇吓皮皮啲瘡，唔係新起架。」

我說：「即係食藥之前起？」

媽媽說：「係呀。睇吓，好多瘡都謝，結晒焦架啦。」

我說：「咁即係唔關醫生啲藥事啦。」

媽媽說：「九成，不過你都係影幾副相好啲。」

我說：「你邊樣先真呀？嗰頭叫我唔好影相，呢頭又叫我影相。」

媽媽說：「都係影幾幅。大部分瘡都係餵魚糧之後起，但係唔可以完全排除有三幾粒可能係食完藥之後起。」

我說：「咁好啦。」

媽媽說：「包魚糧都係要氹架啦。」

爸爸說：「講夠未啫。」

我說：「嘈醒你呀？」

爸爸說：「我一早醒咗啦。」

我說：「唔係嘈醒你，做乜問我哋講夠未？」

爸爸說：「我唔係問你，我問你阿媽，成日話包魚糧要氹要氹，餵到皮皮生晒瘡都仲未捨得氹！」

媽媽笑說：「真係要氹架啦。」

我說：「唉，嘥氣，番學先。」

…….

另一個我說：「信咗主，主就賜新生命俾我架啦？」

我說：「梗係。」

另一個我說：「信咗主，我就係新我架啦？」

我說：「梗係。」

另一個我說：「信咗主，我就唔再係舊我架啦？」

我說：「梗係。」

另一個我說：「你講大話。」

我說：「我講真話。」

另一個我說：「如果你講嘅係真嘅，咁點解我決志信咗主，領埋洗咁耐，啲舊我嘅問題仲一直喺度架？」

我說：「阻住你今日跟從主嗰啲嘢，你今日氹咗未？」

另一個我說：「要氹架啦。」

我說：「即係氹咗未？」

另一個我笑說：「真係要氹架啦。」

我說：「唉，嘥氣，走先。」