「主的呼召，有篩選嗎❓」
篩選的不是主，是我。
……
另一個我說：「你嗰啲每周分享，嗰個禮拜日同咩人分享？」
我說：「屋企人。」
另一個我說：「點解嘅？」
我說：「見到咪俾囉。」
另一個我說：「唔，仲有呢？」
我說：「朋友。」
另一個我說：「點解嘅？」
我說：「見到咪俾囉。」
另一個我說：「唔，仲有呢？」
我說：「老師、同學、學生。」
另一個我說：「點解嘅？」
我說：「見到咪俾囉。」
另一個我說：「唔，仲有呢？」
我說：「教會啲弟兄姊妹。」
另一個我說：「點解嘅？」
我說：「見到咪俾囉。」
另一個我說：「唔，仲有冇呀？」
我說：「接觸過吓嘅陌生人。」
另一個我說：「點解嘅？」
我說：「見到咪俾囉。」
另一個我說：「咁係咪只要係人，你見到都會俾？」
我說：「係呀，嗰網頁又冇密碼嘅，你唔通知我轉載埋都得啦。」
另一個我說：「唔駛篩選下？」
我說：「篩咩選呀？主日日擺嗰場天國的筵席，請客都冇篩選架啦。」
另一個我說：「主點請客法？」
我說：「主叫佢啲僕人出去喺條大街度，見人就請，好人衰人全部請，坐無虛席。」
另一個我說：「你學似主咁樣邀請法，咁咪咩人都收到你啲反思？」
我說：「咁又唔係。」
另一個我說：「點解？」
我說：「我見人就邀請啫，都要佢肯接受先得架。」
另一個我說：「咁我話我接受咪得囉。」
我說：「未得。」
另一個我說：「點解呀又？」
我說：「你講話你接受，只不過每個禮拜日收到我send條俾你嗰Link啫。但係要讀到篇分享，實際係你要抽時間打開Signal或者WhatsApp，親手Click入條Link度，花心機由頭睇到尾先知篇分享噏乜架。」
另一個我說：「咁麻煩！咁我唔睇你啲分享啦，我讀經好過。」
我說：「你講話你讀經，實際都係你要打開本經書，親手揀邊章邊節，由頭讀到尾先知主講咩架。」
另一個我說：「一樣咁麻煩！咁我唔讀經啦，淨係信主算啦。」
我說：「你都識講話係主啦，而家尊貴嘅主都唔駛你三跪九叩，主動過嚟同你講嘢喎，點會唔去想聽清楚架？不過真心信主，就重大陣仗。」
另一個我說：「重大陣仗？」
我說：「真心信主嘅，點會聽完就滿足架？梗係想同主有禱告互動，想反思主講嘅同自己有咩關係，想跟從主喺日常生活裏面分分秒秒去改變自己。如果呢啲一律都唔想嘅，你真係想信主，真係想跟從主，真係想接受主賜嘅新生命？」
另一個我說：「哎呀，簡直係超級麻煩呀，仲話冇篩選？」
我說：「真係冇喎。我有篩選嘅，一初就唔會見人就邀請，嗰網站仲set埋密碼添啦。主有篩選嘅，我哋就唔會聽到有人傳福音，天國就唔會一真心相信耶穌，就係人都入到。」
另一個我說：「篩選嗰個唔係你呢個版主，又唔係耶穌呢個救主，咁究竟係邊個？」
我說：「梗係你呢個成日話麻煩嘅大客仔啦。」
發表新回應