本週反思#199💬

「將福音傳向地極的第一步，是什麼❓」

為主，向身邊不熟悉的人，作見證。

……

21/10/2021（四）14:00 大家樂

我跟我第一個查經老師午餐聚會，談及到傳道人Maggie移民的事。

我說：「我今個禮拜六會去Maggie嘅farewell dinner。」

他說：「星期日查經嗰一班？」

我說：「應該唔止，Maggie有教嘅班都可能會黎。」

他說：「咁你有冇同佢哋分享過你嘅每週反思？」

我說：「冇喎。」

他說：「咁可以考慮吓分享。」

我說：「吓？」

……

我說：「咁就同佢哋分享啦！」

另一個我說：「睇定啲先。」

我說：「仲有咩要考慮？」

另一個我說：「你同佢哋都唔係話好熟。」

我說：「疫情開始冇幾耐到而家，個個禮拜見面都話唔熟？」

另一個我說：「同你之前面對面教嗰班唔同，呢班Zoom見架咋，真人都冇乜點見過，就算有，最多都係一兩次，唔係好熟。」

我說：「而家喺網上分享每週反思咋嘛，要咁熟黎做乜？熟啲網絡穩定啲？」

另一個我說：「唔熟，估唔到佢哋睇完會點？」

我說：「佢哋睇完想點咪點囉，關我咩事？而家唔係佢哋，係我要為主做生活見證呀。」

另一個我說：「不過都唔知主係咪想你同佢哋呢啲唔係咁熟嘅做見證呢？都係等主俾啟示先啦。」

我說：「多餘，主梗係想啦，你仲要啲咩啟示呀？主喺使徒行傳1章8節咪講得好清楚話，要我為佢作見證，直到地極囉。」

另一個我說：「唉，都係到時再算啦。」

……

24/10/2021（日）10:00 Zoom

Maggie說：「喺順境中見證主深刻，定係逆境中見證主深刻？」

……

我說：「喂，我當年咪就係喺逆境中開始寫反思見證主囉。」

另一個我說：「係呀，當年你…」

我說：「都係唔好話當年住，講而家先。星期二唔係話考慮尋日Maggie Farewell Dinner嗰陣同大家分享每週反思，為主做生活見證嘅咩，最終呢？」

另一個我說：「唔記得咗囉，你自己顧住食，怪得邊個？」

我說：「講開又講，啲义燒真係好好食。尋日唔記得唔緊要，而家記得，即刻開咪邀請。」

另一個我說：「而家呀？」

我說：「等去到地極先呀？」

……

我開咪，在Zoom邀請大家訂閱我的每週反思。

Maggie說：「一陣你可以放一篇上去聚餐嗰個群組度，俾大家睇吓。」

我說：「好呀。」

……

24/10/2021（一）Signal 聚餐群組 11:23

我說：「大概五年前，人生仍極度迷惘時，主指派我第一個查經老師鼓勵我，再派傳道人Maggie協助我，在逆境中開始記下我跟主的生活點滴，寫成一篇又一篇的反思，每逢週日發表分享，祈求能藉此見證神，鼓勵人，傳揚福音。本星期二，主再次指派我第一個查經老師鼓勵我藉Maggie Farewell Dinner的機會跟大家分享反思，當時我有點猶疑，未有定案。但今早查經時，主再次在禱告中直接提醒，我決定回應主，邀請大家訂閱我的《每週反思》。現附上最新的一篇《本週分享》。如有興趣訂閱，歡迎隨時WhatsApp / Signal給我短訊。訂閱後，你每逢週日會收到一則WhatsApp / Signal提示。當然，我亦歡迎大家按感動留言回應，或投稿分享。」

我轉載了《本週反思#198》：「香港那一間琴房，大割引❓」

……

我說：「我做得好！」

另一個我說：「你自己讚自己有鬼用呀？睇吓佢哋嘅反應先講啦。」

我說：「睇嚟做乜呀？我都唔係講佢哋讚我做得好，我講我深信主讚我做得好呀。」

另一個我說：「嘩，你知唔知醜呀你？噏得就噏，你當你自己係主呀？」

我說：「我唔係主，但係我有確據。」

另一個我說：「講。」

我說：「我而家服從緊主喺使徒行傳1章8節下嘅命令，喺度開始將福音傳向地極，主一定讚。」

另一個我說：「你連地極都唔知係邊，你憑咩咁肯定你喺度開始將福音傳向地極呀？」

我說：「因為我今次邀請訂閱每週反思嘅對象我唔熟悉囉，乜你同地極班人好熟嘅咩？」