本週反思#196💬

「愛主，如何投入❓」

一切攔阻我投入愛主的，一律拒絕。

……

26/09/2021（日）20:51

電話響起。

另一個我說：「嘩，嗰電話號碼未見過嘅，聽唔聽？」

我說：「仲有電話號碼睇到，聽啦。」

另一個我說：「咁都聽？你係咪有咩財務問題呀？唔怕同我講喎。」

我說：「冇呀，死開啦你。我有時間咪聽囉。」

……

我接聽。

聲音說：「你好，葉偉雄。」

我說：「唔好意思，你邊位呀？」

聲音說：「香港國際音樂學校，Karen呀。」

我說：「哦，Karen。咩事？」

Karen說：「下個禮拜一，10月4號開學啦。」

我說：「我知呀。」

Karen說：「咁下個禮拜一夜晚7點至8點就開學禮。」

我說：「哦。」

Karen說：「今年嘅開學禮，想邀請你代表同學，做學生分享。」

我說：「吓！分享啲咩？」

Karen說：「咪分享喺音樂學校讀音樂嘅苦與樂囉。」

我說：「分享幾耐？」

Karen說：「3-5分鐘。」

我說：「哦，咁呀。但係我讀咗一年High Cert咋喎。」

Karen說：「我哋覺得你過去一年都係讀得好Committed嘅，所以咪邀請你分享囉。」

我說：「哦，咁好呀。」

Karen說：「咁詳情我聽日打電話俾你再講。」

……

另一個我說：「葉sir，「Committed」點解？」

我說：「投入。」

另一個我說：「咁「好Committed」點解？」

我說：「好投入。」

另一個我說：「我係跟從主嘅基督徒，好神聖，唔多識聽你呢啲世俗說話。可唔可以，用聖經語言翻譯一下咩為之「好投入」？」

我說：「好投入，即係類似盡心、盡性、盡意、盡力。」

另一個我說：「我知啦，盡心、盡性、盡意、盡力愛主我的神，馬可福音12章30節。」

我說：「發音準，記性好。」

另一個我說：「你過去一年讀音樂有幾投入？」

我說：「報晒成張High Cert囉。」

另一個我說：「即係上幾多晚堂？」

我說：「三晚。」

另一個我說：「咁都係三晚姐。」

我說：「上完堂，又要讀，又要練，仲要考喎。」

另一個我說：「嘩，邊有咁多時間？」

我說：「將同學習、閱讀、練習音樂時間有衝突嘅嘢，放棄晒佢咪得囉。」

另一個我說：「你放棄晒啦？」

我說：「唔放棄晒點樣全情投入學音樂，成張High Cert讀呀？」

另一個我說：「咁黎緊嗰學年，你係咪全情投入學音樂，成張作曲文憑讀呀？」

我說：「係呀。」

另一個我說：「番幾多晚？」

我說：「四晚。」

另一個我說：「仲番多一晚？」

我說：「唔止番多一晚，學嘅嘢仲要深入啲添，預計課餘要付出更多嘅時間心機。」

另一個我說：「哎呀，咁多時間心機，我就投入唔到啦。」

我說：「你唔鍾意音樂，就投入唔到姐；但愛主，你一定投入到架。」

另一個我說：「點投入呀？」

我說：「阻住你投入愛主嘅，一律拒絕，咪有心機時間投入囉。」

另一個我說：「你係咪喺平行時空呀？定係而家番咗天家呀？」

我說：「咩呀？你啱啱先話你自己係跟從主嘅基督徒，好神聖。嘩，如果咩嘢阻住你俾時間心機愛主嘅，你都照單全收嘅，點樣全情投入，點樣盡心、盡性、盡意、盡力愛主你嘅神呀？」