本週反思#194💬

「死而復生的人，有何不同❓」

積極。

……

18/09/2021（六）20:00 家

下課，學生接受家人的邀請，留下來吃晚餐，話當年。

學生說：「你睇下我隻腳。」

我說：「嘩，你啱啱先整親好番，又嚟？」

媽媽說：「攪咩呀？」

學生說：「我番工嗰陣踩單車，跌咗落地再整親。」

媽媽說：「哎呀，啱啱先縫完針好番啲，你就咪踩單車啦。」

學生說：「公司好大，行路好慢呀！」

媽媽說：「咪住，番工踩單車，算唔算工傷？」

學生說：「算。」

媽媽說：「即係睇醫生，公司全包？」

學生說：「包唔晒架，除非睇公立啦。」

媽媽說：「咁你上次傷口縫針，係咪睇公立？係咪公司全包？」

學生說：「係睇公立急症，係公司全包。」

媽媽說：「咁今次都睇公立急症咪得囉。」

學生說：「唔睇啦，少事姐，公立排隊排好耐。」

媽媽說：「耐咪耐囉，有咩緊要得過自己身體？」

學生說：「唉，唔好嘥時間，做多幾年都退休囉。退休幾年之後，都差唔多時間架啦。」

我說：「差唔多時間死呀？」

媽媽說：「大吉利是。」

學生說：「係呀。」

我說：「你點知自己退咗休幾年就死呀？耶穌話你知？」

媽媽說：「衰仔，係咪咁講嘢呀？」

爸爸說：「我又到咗退休年齡，又重糖尿，都未諗住死；你未退休，好人好者，就諗住死啦。」

學生說：「你今年幾多歲？」

爸爸說：「60幾。」

學生說：「嘩，你60幾架拿？」

爸爸說：「我今年60幾，都唔係諗住死，係諗點樣可以唔駛死住。」

學生說：「退咗休，駛晒啲積蓄，到時點到我哋唔死呀？」

爸爸說：「冇錢咪問仔女攞。」

媽媽說：「你嗰仔咁駛錢法，未必有錢剩俾你！」

我說：「哈哈，都係架。」

爸爸說：「仔女冇錢俾問政府囉。」

學生說：「政府津貼要審查架，你話攞就攞咩？」

爸爸說：「我而家都有2蚊搭車，仲有醫療卷添啦。」

學生說：「係呀？不過呢啲可能快啲，其他津貼可以審好耐架！」

爸爸說：「等緊審批冇飯開嘅，咪落樓下輪飯囉，唔好咁高要求就得架啦。」

學生說：「咁又係。」

爸爸說：「唔好成日諗住死，要諗吓點樣積極求生先得嘅。」

……

另一個我說：「你老豆咁積極求生嘅。」

我說：「死過反生，知道生命可貴掛？」

另一個我說：「你老豆信咗耶穌，有永生啦？」

我說：「未信。佢幾年前重糖尿入聯合，醫生話可能係咁先架啦，點知主送番佢出嚟。」

另一個我說：「真係感謝主。喂，你老豆執番條命，未信耶穌，未有永生，都咁積極求生；你信咗耶穌，有新生命，有永生，咁你又點呀？」

我說：「我就梗係唔單止日日跟隨主番工積極搵食求生啦，仲晚晚跟隨主放工積極追尋理想學音樂，仲個個禮拜日放假跟隨主喺嗰網頁度積極分享宣揚主有幾好。」