「神凡事預備，真的嗎❓」
如一直憑信心竭力尋求，必定找到。
......
31/05/2021（一）18:45 香港國際音樂學校琴藝坊
實科演奏課
老師說：「好，今日係咁多。」
我說：「多謝，下個禮拜見。」
老師說：「呀！唔知而家主任喺唔喺Office呢？」
我說：「應該喺。」
老師說：「你又知？」
我說：「一陣7點上視唱練耳，主任教。唔會7點上堂，6點9都未番掛。」
老師說：「好，我上去搵下佢先。」
我說：「好，拜拜。」
......
31/05/2021（一）19:30 香港國際音樂學校
視唱練耳課
主任說：「偉雄。」
我說：「喺度。」
主任說：「你實科嘅老師話會離開學校移民，你知嗰可？」
我說：「佢早前提過一次話有可能，不過未落實。」
主任說：「落實咗啦。」
我說：「咁幾時？」
主任說：「6月尾。」
我說：「吓？」
主任說：「咁你7月點呀？你而家跟緊我執手，本來打算跟到暑假完再算，咁7月可以直接轉過嚟跟我學？又或者揀跟其他老師學都得嘅？」
我說：「我直接跟你學。」
主任說：「OK。」
......
另一個我說：「嘩，你老師，話走就走。」
我說：「係呀，6月尾就離職準備移民。」
另一個我說：「5月尾先確實通知你，咁遲先通知，點準備得切呀？點算呀？」
我說：「你咁擔心做咩？我係當事人都冇你咁擔心。」
另一個我說：「早啲通知，可以早啲準備呀嘛。」
我說：「神咪一早準備咗囉。」
另一個我說：「神一早準備咗咁遲先叫主任通知你呀？」
我說：「神早喺大概三個月之前，即第二個學期初，咪叫我報讀《音樂的階梯》，仲叫我向主任求教執手，為呢次交接作準備。再講呀，我開始跟主任學之後，冇再練琴練到成身痛啦。」
另一個我說：「嘩！如果當日你唔報讀《音樂的階梯》，唔向主任求教，而家咪變咗孤兒學生？」
我說：「咩孤兒學生呀？講到咁誇張，就算我當日唔報讀《音樂的階梯》，學校都仲有其他老師架嘛，神仲有預備。」
另一個我說：「預備？預備？唔係嗰個老師都夾得到你，攪到你唔再練琴練到成身痛架嘛！又唔知自己麻鬼煩！到時搵唔到，我睇吓你點樣怨神冇預備？」
我說：「如果一時搵唔到合適嘅老師，到時應該唔係怨神冇預備，係反問自己有冇一直尋求，把握神一個又一個嘅預備。」
另一個我說：「到時搵唔到嘅，反問自己有鬼用咩？」
我說：「好有用。會反問自己嘅，先識把握神下一個預備架嘛。」
發表新回應