本週反思#187💬

「備試，如何找到主的支持❓」

別只看輸贏。

……

15/06/2021（二）19:00 香港國際音樂學校

聖三一音樂學院AmusTCL樂理考試預備課程

另一個我說：「你點知道有聖三一音樂學院AmusTCL樂理考試架？」

我說：「音樂學校春季課程電子單張寫嘅。」

另一個我說：「你幾時報咗備試課程架？我唔知嘅。」

我說：「做咩要樣樣嘢都同你報告呀？你係我嘅主呀？」

另一個我說：「唔同你拗，你做咩報備試課程？」

我說：「報備試課程，就梗係預備考試架啦。」

另一個我說：「你八級樂理，直接考咪得囉，做咩要花時間心機預備呀？」

我說：「預備得就梗係要 - 贏。」

…..

導師介紹自己。

…….

另一個我說：「你俾咗好多錢報課程呀？」

我說：「唔係，幾千蚊咋。」

另一個我說：「幾千蚊？」

我說：「係呀。」

另一個我說：「你知唔知導師咩學歷呀？」

我說：「音樂博士，主修作曲。」

另一個我說：「俾嗰幾千蚊，搵個博士級人馬同你備晒成個考試，主真係賣大包。」

…….

導師派發課程大綱和筆記。

導師說：「大家睇一睇嗰課程大綱，成個Amus嘅備試課程分成20堂，每堂3個鐘，總共60個鐘。」

我看一看課程大綱。

導師說：「20堂嘅分佈係咁嘅，大概每3堂處理1條題目，總共處理6條，考試就係6揀5黎答。」

我再看一看課程大綱。

導師說：「上課時間係咁嘅，6月至8月每個禮拜1堂，處理Part A比較深嘅題目。」

我再看一看課程大綱。

導師說：「9月每個禮拜2堂，處理Part B比較淺嘅題目。」

我再看一看課程大綱。

導師說：「9月尾最後嗰個禮拜四就課程完結，啱啱10月開學，一個月之後，即係11月，就可以考試啦。」

我再看一看課程大綱。

導師說：「今年好特別，呢個課程其實好多年冇開架啦。」

同學說：「點解嘅？」

導師說：「唔夠人報名囉。」

同學說：「咁今年又開嘅。」

導師說：「好多年冇開，學校話再試吓開，點知夠人報名，咪開得成囉。」

…….

另一個我說：「嘩，你請多咗個秘書呀？」

我說：「白痴呀你，出面嗰個音樂藝術家黎架。」

另一個我說：「音樂藝術家，啲時間應該亂晒籠先係架？」

我說：「佢唔單止係音樂藝術家，仲係系統井然、條理分明、專門研究音樂理論嘅學者。」

另一個我說：「嘩，你俾嗰幾千蚊，夠租課室架咋。嘩，主真係呀！唔止賣大包，仲要賣豉油送雞。」

我說：「哈哈，咪住！」

另一個我說：「咩呀？」

我說：「點解你睇到神賣豉油送雞架？我係俾錢嗰個都睇唔到喎。」

另一個我說：「你發雞盲，點會睇到有雞送呀？」

我說：「你係基督徒，我咪又係基督徒。你生雞眼，所以就睇到隻雞呀？」

另一個我說：「我冇生雞眼。」

我說：「你冇生雞眼，咁你點樣睇到，神賣豉油送雞呀？」

另一個我說：「係你發雞盲，先淨係睇到考試要贏姐。」

我說：「考試即係比賽，唔係贏就係輸，仲有啲咩？」

另一個我說：「仲有神囉。」

我說：「神，贏咪有，輸咪冇囉。」

另一個我說：「教你考試嘅博士級導師你安排架？」

我說：「唔係我。」

另一個我說：「備試時間表你叫導師整架？」

我說：「唔係我。」

另一個我說：「備試班咁多年冇開，你湊夠人報名叫音樂學校今年開俾你架？」

我說：「唔係我。」

另一個我說：「AmusTCL開考，你叫音樂學校登上春季課程度通知你架？」

我說：「唔係我。」

另一個我說：「你報名嗰幾千蚊，你出糧俾你自己呀？」

我說：「唔係我。」

另一個我說：「哦，原來冇樣嘢係你，但係你呢，贏就有神，輸就冇神。咁唔係神唔支持，都唔係神收埋啲支持唔俾你搵到，係你自己恨贏恨到成程發晒雞盲咋！」