本週反思#178💬

「聖經，是人生說明書嗎❓」

只是一小部分。

……

記憶大概是這樣的。

2008年，我就讀教育學院第二年，在中學實習。

同事說：「我決定提早退休。」

我說：「點解唔教呀？」

同事說：「攞肥雞餐囉。」

我說：「你合資格呀？」

同事說：「係呀。」

我說：「但係你都唔算老。」

同事說：「教書冇前途架，你都唔好教啦。」

我說：「點解？」

同事說：「教書，夕陽行業嚟㗎啦。」

我說：「點夕陽行業法？」

同事說：「而家啲人上晒網，邊樣嘢唔識，咪㩒制search囉，咩都搵到啦。」

我說：「搵到又點呀？」

同事說：「咁咪唔駛搵老師攞。」

......

另一個我說：「今年2021年囉喎，咩夕陽都落晒山啦，你仲教？」

我說：「係呀，仲有得教。」

另一個我說：「啲人唔係上晒網，邊樣嘢唔識，就㩒制search，咩都搵到嘅咩？」

我說：「係呀。」

另一個我說：「咁仲有人搵你教書？」

我說：「仲有人搵我教呀，搵我嗰啲都唔係搵書。」

另一個我說：「佢哋唔係搵書，搵咩？」

我說：「佢哋係想搵老師，想跟我學翻譯、學英文。」

.......

另一個我說：「我決定唔信耶穌啦。」

我說：「點解唔信？」

另一個我說：「耶穌，夕陽信仰嚟架啦。」

我說：「點夕陽信仰法？」

另一個我說：「聖經係人生說明書，咩人生指引都有，仲成本放晒上網，我有邊樣人生問題，一上網㩒制search，咩都搵到啦。」

我說：「搵到又點呀？」

另一個我說：「咁咪唔駛信耶穌攞。」

我說：「我2009年決志信主，2012年領洗。」

另一個我說：「你仲信耶穌？聖經咩人生指引都有齊啦，上網search聖經咪得囉！」

我說：「我唔係想搵書。」

另一個我說：「你唔係搵書，搵咩？」

我說：「我想搵神，想跟從主耶穌。」

另一個我說：「聖經已經係人生說明書啦，說明清楚你嘅人生，仲唔夠？做咩仲要搵耶穌？」

我說：「你唔好再限制聖經啦。」

另一個我說：「我冇限制聖經。」

我說：「仲話冇？聖經唔係淨係你嘅人生說明書黎架！」

另一個我說：「我知，神愛鄰舍呀嘛，聖經都係我隔離嗰個嘅人生說明書。」

我說：「仲係度限制聖經！」

另一個我說：「我知，神愛世人呀嘛，聖經仲係全人類嘅人生說明書。」

我說：「你同我收啦，我唔想再聽到你係我面前限制聖經。」

另一個我說：「限制，限制，咁聖經仲可以攞嚟做咩？」

我說：「神寫聖經，唔係淨係攞嚟做人生說明書架，仲係用嚟話俾我哋知佢係點，教我哋點樣去同佢同埋身邊嘅鄰舍建立關係。」

另一個我說：「知啦，我都冇講過話聖經淨係人生說明書。」

我說：「知你又話，有人生說明書，唔要關係？」

另一個我說：「我唔係咁嘅意思！」

我說：「唔係咁你又，有聖經，唔要耶穌？」