「聽過道，就傳道❓」
不行道，別傳道。
......
24/02/2021（三）20:00 家
我說：「好，今堂係咁多，下堂見。」
學生說：「葉sir。」
我說：「啱啱教嘅句型，仲有問題？」
學生說：「唔係句型問題。」
我說：「咁係咩問題？」
學生說：「我想問你，打唔打針？」
我說：「唔打住。」
學生說：「點解？」
我說：「等多啲資料出嚟先再考慮啦，而家邊啲人打得，邊啲人唔打得，都冇詳細資料。」
學生說：「我都唔知打唔打好？」
我說：「你年紀都唔細，身體又唔係好好，血壓仲好似有啲高。」
學生說：「咪係囉，不過好多同事都打咗。」
我說：「你好多同事打咗關你咩事？你班同事同你年紀差唔多，身體狀況差唔多？」
學生說：「我啲同事細過我，身體好過我。」
我說：「咁咪係囉。」
爸爸說：「唔怕，怕咩姐？」
我說：「點解唔怕？」
爸爸說：「冇嘢嘅，啲同事打，咪去打囉。」
我說：「你打咗啦？」
爸爸說：「未呀。」
我說：「我想你重複一次你頭先講嘅嘢。」
爸爸說：「做咩要我重覆呀？」
我說：「我要錄音。」
爸爸說：「做咩要錄音？」
我說：「我要錄音Whatsapp話俾佢家姐聽，等佢知道我老豆連自己都唔做嘅嘢，就隨口勸我個學生即佢細妹去做。」
爸爸說：「我唔同你講，你癡線嘅。」
爸爸返回房間。
......
另一個我說：「信耶穌，得永生。」
我說：「信耶穌係咩？」
另一個我說：「信耶穌為你嘅救主同埋生命嘅主。」
我說：「點信呀？係咪念完決志經文就得架啦。」
另一個我說：「你當耶穌係燈神呀？念完就得！耶穌係主呀，你跟從嗰個先係主？」
我說：「點跟？」
另一個我說：「方法好簡單，撇下一切所有。」
我說：「你點知呢嗰方法架？」
另一個我說：「我讀經知道嘅，路加福音14章33節。」
我說：「撇下一切所有即係？」
另一個我說：「即係神第一位，冇嘢比神更重要。」
我說：「你點知道架？」
另一個我說：「我星期日查經聽道學番黎嘅。」
我說：「咁你自己撇下一切所有，跟從耶穌未呀？」
另一個我說：「未喎。」
我說：「我想你重覆一次你頭先講嘅嘢。」
另一個我說：「做咩要我重覆？」
我說：「我要錄音。」
另一個我說：「做咩要錄音？」
我說：「用嚟提醒我，耶穌係你自己都唔信唔跟，就隨手質俾我嘅神。」
發表新回應