本週反思#298💬

「最合適的安慰和鼓勵，主如何送上❓」

指派同路人。

…….

21/09/2023（四）13:00 香港演藝學院二樓

作曲導修第一堂完結

另一個我說：「開學開成點？」

我說：「好大壓力，好沮喪。」

另一個我說：「壓力邊度黎？」

我說：「視唱練耳（Aural Perception）。」

另一個我說：「點解視唱練耳有壓力？你冇聾又冇啞。」

我說：「我唔止又聾又啞，仲要四肢殘廢。」

另一個我說：「點樣啞法？」

我說：「啲音同節奏，要唱嘅嘢太快太多，唱唔切啦。」

另一個我說：「點樣聾法？」

我說：「唱完之後，Miss逐個問有冇聽到邊度錯，我淨係識啱：「唔」。」

另一個我說：「「唔」即係咩意思？」

我說：「「唔」即係「唔知」。」

另一個我說：「點樣四肢殘廢？」

我說：「Miss唔止要我哋又聽又唱，仲要用右手指揮基本拍（beat），左手打分拍（division）。」

另一個我說：「咁你郁唔到呀？」

我說：「我喺度抽晒筋咁囉。」

另一個我說：「咁點算？」

我說：「Miss叫我先練口，後練手，再練腳，最後點頭。」

另一個我說：「咁就得啦。」

我說：「未得。」

另一個我說：「仲要點？」

我說：「分開練完，再逐組合併練。口加左手，口加右手，口加左腳，口加右腳，口加左右手，口加左右腳，口加右手左腳，口加右手右腳，口加左手右腳，口加左手左腳……最後頭口手腳，全身練晒。」

另一個我說：「……之前嘅練法好啱你？」

我說：「咩呀？」

另一個我說：「左手左腳。」

我說：「唉，所以咪好大壓力，好沮喪囉。」

另一個我說：「其他科呢？」

我說：「唔想講住。」

另一個我說：「你唔駛灰心，萬大事有主。」

我說：「收檔啦你，你份人自我中心，成世人到而家都淨係識坐喺冷氣房度紙上談兵，冇同主出去經歷過風浪，係唔會明我而家嘅處境，唔好再喺我面前背書。」

另一個我說：「心情咁差點練習呀？不如去散下心先啦！」

我說：「唔駛。今日嘅視唱練習，我已經完成咗啦。」

另一個我說：「吓，心情咁差點練得好？」

我說：「唔係，我得到安慰同鼓勵，心情平伏番先練習架。」

另一個我說：「你得到安慰同鼓勵？啱啱先叫我收檔，話我自我中心，成世人淨係識坐喺冷氣房度紙上談兵，冇同主出去經歷過風浪，係唔會明你處境，仲叫我唔好再喺你面前背書。」

我說：「我都冇講過喺你度得到安慰同鼓勵。」

另一個我說：「知你者莫若我，唔喺我度？」

我說：「收檔啦，啱啱先話完你自我中心，咪以為你好清楚我呀。」

另一個我說：「咁唔喺我度，喺邊個度？」

我說：「喺主安排俾我嘅爵士鋼琴老師度囉。」

另一個我說：「佢咩料呀？」

我說：「佢喺演藝主修聲樂，當年佢一個音樂素人入演藝，一步一步走過艱苦嘅音樂訓練，尤其視唱練耳呢一科，由肥佬練到全班第一。我而家喺演藝嘅境況，佢最能夠體會了解。」

另一個我說：「主安排佢幾時喺邊度安慰同鼓勵你架？」

我說：「今日下晏6點46分WhatsApp留言俾我囉。」