「平安，何處尋❓」
信主，行。
…….
18/11/2021（四）12:00 家
我遞給媽媽幾張銀紙。
我說：「家用。」
媽媽數算一下。
媽媽說：「啱數。」
我執拾行裝。
爸爸說：「你啱啱打完波番黎又出去？」
我說：「係呀。」
爸爸說：「又攪你嗰啲音樂？」
我說：「係呀。」
爸爸說：「你今日放假嗰喎，放假都仲攪？」
我說：「就係放假先有時間攪，平時番工冇乜得點攪。」
爸爸說：「你放假都唔留低陪下皮皮。」
我說：「朝朝陪攞喎，朝朝六點幾都帶晒兩隻去晨運，今朝你先睇住我哋行完番黎，發雞盲呀你。」
爸爸說：「尋晚皮皮等你門，你唔番皮皮都唔肯瞓。」
我說：「咁咪由皮皮唔好瞓，皮皮又唔駛番工。」
爸爸說：「皮皮唔瞓搞住我，搞到我冇得瞓。」
我說：「你累咪就唔好理皮皮，你唔理佢，佢就唔攪你架啦。」
媽媽說：「你同佢講咁多做乜？你個仔唔會睬你架，佢都不負責任嘅。」
我說：「你知唔知自己噏緊乜嘢？唔負責任嘅仔，會俾家用你嘅咩？」
媽媽說：「我唔係講呢啲，我講緊你買咗兩隻嘢番黎，跟住就顧住攪你嗰啲音樂，劈低兩隻嘢喺度，由佢哋自生自滅。」
我說：「你失憶呀？我啱啱上嗰禮拜日，先專登停止攪音樂，帶皮皮去紅磡睇醫生，睇咗成千蚊。你好似有跟埋黎，仲喺度話嗰醫生幾好嗰喎。」
媽媽說：「老豆，你話，生咗嗰咩出嚟？」
爸爸說：「一碌頂心杉囉。」
我說：「係咁啦，出去。」
……
另一個我說：「擺低你阿媽一個喺屋企去攪音樂，會唔會唔係咁好？」
我說：「佢以前就係得一個，而家有伴架啦，主2007年帶咗我老豆番屋企，而家仲修復埋關係，啱啱一齊砌我添。」
另一個我說：「咁擺低兩老喺屋企去攪音樂，會唔會唔係咁好？」
我說：「主知佢兩個怕寂寞，已經派咗我兩年前買咗皮皮同埋筒筒番黎陪佢哋。嗰兩公婆而家理皮皮同筒筒多過理我啦。」
另一個我說：「但係你2005年開始接觸音樂，到2020年正式入學，都成15年有多，佢哋兩老都仲係咁，一句說話支持吓都冇嘅？」
我說：「我都想知，你去問嗰兩公婆啦。」
另一個我說：「會唔會其實主想透過佢哋話你知，主唔係咁想你全心讀音樂呀？想你抽多啲時間陪佢哋？」
我說：「連你都失憶呀？失憶就去食藥啦！我想認真讀音樂，主就幫我搵香港國際音樂學校；我要搵錢讀音樂，呢間大學冇得教，主就幫我搵到另一間。我想專心讀音樂，主就介紹嗰主內姊妹半價分租間band房俾我。咁樣主都唔係想支持我全心讀音樂呀？」
另一個我說：「不過你讀音樂，要擺低兩老，我嗰心始終都仲係唔係好安樂？」
我說：「你信唔信，主會照顧好兩老？」
另一個我說：「信。你老豆死過番生，你阿媽又冇穿冇爛。但係唔怕一萬，至怕萬一，萬一兩老有咩事點算？」
我說：「你信唔信，主會提醒佢哋，有咩事自己識打電話搵我或者阿妹？」
另一個我說：「信。佢哋兩個都有手機，仲識上網。只不過我嗰心仲係囉囉攣，唔係好平安。」
我說：「主做咗咁多，你都仲唔平安？你要點先平安呀？俾晒你做主好唔好呀？」
另一個我說：「我嗰心未平安，只不過係因為未能夠完全確定，讀音樂究竟係咪最適合你姐？」
我說：「我信係，我信主安排得俾我嘅，就係最好、就係最適合。好，走先。」
另一個我說：「你走去邊呀？我嗰心仲係未平安呀！」
我說：「我而家要同我嘅平安，即係主耶穌基督，一齊番band房整Logic Pro X Project，係咁。」
發表新回應