「主說你很安全，相信嗎❓」
信，就立即跟主踏出安舒區。
……..
05/03/2023（日）04:30
我突然醒來。
另一個我說：「幾點？」
我說：「凌晨四點半。」
另一個我說：「做乜咁早醒？」
我說：「發夢。」
另一個我說：「發咩夢？等我同你解吓。」
我說：「諗唔起。」
另一個我說：「唉……」
…….
我呆坐一會，有一股意念湧出來。
意念說：「你好安全。」
我說：「我好安全。」
…….
另一個我說：「講咩話？」
我說：「佢同我講話，你好安全。」
另一個我說：「我都冇講嘢。」
我說：「我都冇話你同我講，我話佢同我講。」
另一個我說：「佢係乜東東？」
我說：「主呀，我深信。」
另一個我說：「你聽到主講嘢？」
我說：「唔係，我深信啱啱腦裏面嗰意念係主俾我，佢同我講我好安全。」
另一個我說：「你好危險咩？你以為自己係大衛？俾掃羅追殺呀？」
我說：「唔係，我係有啲擔心啫。我諗主係想提醒我，佢係會一直同行，同我一齊面對跟住黎緊更大嘅挑戰。」
另一個我說：「咩更大啲挑戰？」
我說：「第一，係想組織舊生合奏會。」
另一個我說：「你作曲搵同學合奏呀？」
我說：「暑期五月開始作。」
另一個我說：「即係未作，五月我俾個官你做呀！你搵到邊個同學參加未？」
我說：「我開咗嗰WhatsApp社群，recruit緊同學。」
另一個我說：「即係而家未有人！你同學校傾唔傾得埋攔？」
我說：「我草擬咗份簡單嘅計劃，打算作完曲，埋齊班，攞埋嗰WhatsApp社群，七月Musical之後同學校傾。」
另一個我說：「即係傾都未傾，十劃都未有一撇。你呢壇嘢會唔會攔尾架？」
我說：「唉…唔知，見步行步啦。」
另一個我說：「嘩，乜你咁鬼牙煙嘅？」
我說：「主話我好安全。」
另一個我說：「安息就有你份。」
我說：「我唔得閒瞓，我而家邁向專業。」
另一個我說：「專業？你業餘音樂學生呢咋！」
我說：「我係邁向專業，演藝3月4號下晏1點25分send email同我講嘅。」
另一個我說：「演藝講咩？」
我說：「This is a highly selective process. The next audition and interview is to determine whether we feel you are ready to enter a course of professional training at the next level of studies.」
另一個我說：「翻譯。」
我說：「這是一個嚴謹的篩選程序。接下來的試演和面試的目的，是決定你是否預備好開展下一階段的專業學習。」
另一個我說：「演藝叫你面試？」
我說：「我收到演藝嘅學院入學試，作曲系嘅入學試同埋最後面試邀請。」
另一個我說：「下一階段專業音樂學習係點？你攪唔攪得惦架？」
我說：「我連入學試實際考乜都未知，見步行步啦。」
另一個我說：「嘩，乜你咁鬼牙煙嘅？」
我說：「主話我好安全。」
另一個我說：「邊度安全呀？簡直步步驚心，你乜鬼都唔知！」
我說：「我相信我好安全，我認識同跟實全知全能嘅主。」
另一個我說：「好安全？你同我講嘢呀？」
我說：「我同你已經講完。我而家要跟主去溫習Orchestral Range準備作曲入學試，同埋邀請同學加入舊生音樂合奏社群，再見。」
發表新回應