「愛的界線，如何劃❓」
拒絕含糊其詞、模棱兩可。
……
22/01/2023（日）年初一 08:00 家
媽媽說：「聽晚年初二，夜晚阿妹番黎食飯。」
我說：「知道。」
媽媽說：「你番唔番？」
我說：「番，幾點？」
媽媽說：「正常，八點。」
我說：「OK，八點。」
媽媽說：「都係唔好。」
我說：「想幾點？」
媽媽說：「都係七點半。」
我說：「OK，七點半。」
媽媽說：「都係唔好。」
我說：「想幾點？」
媽媽說：「都係七點。」
我說：「OK，七點。」
媽媽說：「都係唔好。」
我說：「你究竟想幾點？」
媽媽說：「我想就埋阿妹時間。」
我說：「OK，有冇問過阿妹幾點得？」
媽媽說：「冇呀，我估你阿妹應該七至八點之間番，你七點番黎先啦。」
我說：「唔得。」
媽媽說：「你又話七點得？可以就阿妹？」
我說：「我七點得，七點半得，八點得，甚至其他任何一個時間都仲得，就阿妹亦得，但係唔問清楚，矇查查喺度傻等就唔得。我係想一家人一齊食晚飯，但唔係想浪費時間，不如等我打電話問阿妹幾點得。」
媽媽說：「等我問。」
我說：「好，咁你決定咗一個時間，就通知我。」
……
22/01/2023（日）年初一 09:15 紅茶冰室
爸爸來電。
爸爸說：「聽晚七點半番黎。」
我說：「OK。」
……
另一個我說：「你係咪愛屋企人架？」
我說：「愛。」
另一個我說：「吹水啦，愛又咁吝嗇時間？」
我說：「任君選擇都吝嗇？我七點得，七點半得，八點得，再轉時間都仲得喎，只係盲等就唔得，清清楚楚。」
另一個我說：「駛唔駛咁清楚呀？」
我說：「主都係咁清清楚楚。」
另一個我說：「主好愛我哋，好包容，邊有你咁吹毛求疵。」
我說：「喂，包容唔係求求其其，矇矇查查，主咩得咩唔得，聖經寫得鉅細無遺，清楚過我多多聲。」
另一個我說：「係咩？我唔知嘅。」
我說：「你梗係唔知啦，你自己都唔讀經禱告，一手信仰係零。」
另一個我說：「我有查經聽道，有二手信仰架。」
我說：「有鬼用？講得啱聽嘅你就聽，唔啱聽嘅你就唔聽；不過就算聽咗，二手信仰都係零。」
另一個我說：「點解？」
我說：「你聽完就算，冇行動跟進嘅，咁叫做信咩？你呢啲當聽YouTube過吓日晨咋嘛。」
另一個我說：「新年流流，我唔同你嘈。主嘅愛究竟係點？」
我說：「主話，你若口裏承認耶穌是主，心裏相信神叫祂從死裏復活，就必得救。」
另一個我說：「必得救？我睇未必，仲要睇埋一籃子嘅因素經營成點先得。」
我說：「主愛嘅拯救只在乎信，冇含糊其詞，冇模棱兩可，冇其他。」
發表新回應