「最清楚我的就是主，為什麼❓」
我相信，祂就是創造我的主。
……
07/12/2021（二）18:13 香港國際音樂學校
學長傳來短訊。
學長說：「食唔食晚飯？」
我說：「而家？」
學長說：「係呀。」
我說：「我而家就係準備行過去開餐，食完番去合唱團。」
學長說：「去慈雲山嗰邊食？」
我說：「係呀。」
學長說：「你食住先，到咗call你。」
我說：「OK。」
……
07/12/2021（二）18:30 叙苑粉麵茶餐廳
侍應說：「食咩？」
我說：「晚餐B。」
侍應說：「飲咩？」
我說：「凍檸茶。」
十分鐘之後，學長到達。
侍應說：「食咩？」
學長說：「晚餐B。」
侍應說：「飲咩？」
學長說：「熱檸水。」
我們交流一下學習音樂的事情。
……
07/12/2021（二）19:30 叙苑粉麵茶餐廳
學長說：「喂，過鐘啦。」
我說：「係喎，咁埋單先。」
學長說：「你俾散紙我，我俾大紙。」
我說：「好。」
我伸手入背囊，搏命尋找。
學長說：「點呀？」
我說：「原來我冇帶錢。」
學長說：「你冇帶錢？你唔駛帶銀包出街？」
我說：「冇帶好耐，唔見銀包，淨係我記得都已經有七次。而家冇用銀包，證件放喺袋，錢就夾埋，不過今日冇帶。」
學長說：「你冇帶錢，今日晏晝嗰餐冇食嘢呀？」
我說：「有食，食七仔，用吊住喺我頸度嗰張八達通找數。呀，等我出去睇吓收銀有冇八達通機先。」
學長說：「好呀。」
我行出去，再回來。
我說：「冇八達通機。」
學長說：「咁我幫你俾住先。」
我說：「唔該晒，下個禮拜還番俾你。」
學長說：「行啦。」
…..
另一個我說：「想食霸王餐呀？」
我說：「唔係。」
另一個我說：「知唔知自己唔記得帶錢？」
我說：「我唔知。」
另一個我說：「算你好彩，如果冇錢俾，我唔知你點離開叙苑？」
我說：「我唔知。」
另一個我說：「冇啦啦學長又會搵你食晚飯嘅？」
我說：「我唔知。」
另一個我說：「乜鬼你都唔知，咁主最清楚你又甩又漏，你知唔知？」
我說：「呢個我知，我信主創造我架嘛，主唔清楚我甩漏，又點會派學長黎幫我埋單呀？」
另一個我說：「哦，咁即係如果主唔派學長黎幫你埋單，就對你份人係點一無所知啦？」
我說：「錯晒！我都話信主創造我囉，主就係太清楚我甩漏啦，如果主真係唔派學長黎幫我埋單嘅，或者係時候要教訓一下我啦。」
另一個我說：「張單埋咗你而家就牙斬斬，主真係唔派學長黎，我睇吓你點死！」
我說：「駛乜死呀？主仲留咗部手機俾我架嘛，打電話求救咪得囉，主造得我好醒架。」
發表新回應