本週反思#205💬

「主賜的生命，你有多愛呢❓」

看看自己願意付出多少代價就知道。

……

05/12/2021（日）20:00 獸醫診所

獸醫說：「貓貓叫咩名？」

媽媽說：「筒筒。」

獸醫說：「有咩唔舒服？」

媽媽說：「又冇換過糧，又冇餵佢食零食，但係耐唔耐就嘔。」

獸醫說：「咁我檢查吓先。」

獸醫檢查筒筒一番。

獸醫說：「筒筒肚仔冇嘢喎。」

獸醫看看皮皮。

獸醫說：「筒筒嘔之前有冇偷食皮皮啲糧？」

媽媽說：「哎呀，有呀。」

獸醫說：「咁可能關啲糧事。呢幾日仲冇冇嘔？」

媽媽說：「冇啦。」

獸醫說：「冇持續嘔，咁應該係關偷食狗糧事。餵皮皮嗰陣，唔好俾筒筒走埋去。」

我說：「明白，多謝醫生。咁行啦。」

獸醫說：「咪走住。」

我說：「吓？」

獸醫說：「筒筒肚仔冇事，但係嗰心有啲雜音。」

媽媽說：「咩意思？」

獸醫說：「即係筒筒可能心臟有事！筒筒呢個品種都好常見嘅。」

媽媽說：「咁駛唔駛食藥？」

獸醫說：「未知，要詳細檢查下先知。」

媽媽說：「點樣檢查法？」

獸醫說：「檢查方法有兩種。第一種，驗血。驗血就知道筒筒係咪有問題，有問題就照超聲波。第二種，直接照超音波，照完心臟有咩問題就一清二楚。」

我說：「即係驗血查唔到心臟有咩事，驗黎做咩？」

獸醫說：「驗血冇事，有人就會選擇唔照超聲波，慳返啲錢。」

我說：「咁驗血冇事，係咪等於心臟冇事？」

獸醫說：「唔係，驗血只可以顯示問題嘅嚴重程度。驗血有事，極有可能問題已經發展到中等至嚴重。」

我說：「直接照超聲波，有咩好處？」

獸醫說：「心臟問題越早發現越早醫，動物壽命越長。」

我說：「驗血幾多錢？照超聲波幾多錢？」

獸醫說：「驗血$550，超聲波$2,300。」

大家沉默了一會。

媽媽說：「咁驗血先。」

我說：「直接照超聲波。」

獸醫說：「咁即係？」

我說：「即係直接照超聲波。」

獸醫說：「咁媽媽呢？」

我說：「我俾錢，我話直接照超聲波。」

媽媽說：「佢先係筒筒老豆，佢俾錢，佢話直接照超聲波就直接照超聲波啦。直接照都好，一清二楚。」

獸醫說：「好，咁出去約期。」

……

另一個我說：「驗血先，可能可以慳番$1,800。」

我說：「駛多$1,800直接照超聲波，可以更加愛護主賜俾筒筒嘅生命。」

另一個我說：「你寫少篇見證反思，可以慳返啲時間做自己嘢。」

我說：「我寫多篇見證反思，可以更加關愛主賜俾鄰舍嘅生命，尤其未信主嗰啲。」

另一個我說：「主耶穌當年其實講少兩句，早啲閃人，可能可以執番條命。」

我說：「主耶穌當年講完又講，自願上十字架捨命，就係最愛惜佢賜俾我哋嘅生命，要送永恆嘅救贖俾我哋。」