「敲門，為何尋不見真神呢❓」
開門，原來想找燈神。
......
11/03/2021（四）17:00
家長說：「我嗰仔小學英文好好，中學英文差咗好多。」
我說：「點解咁講？」
家長說：「我嗰仔中學開始，英文考試都未合格過。」
我說：「可能唔係仔仔英文變差，而係學校份考試卷變深。」
家長說：「不如你睇吓啱啱中期考試個份考試卷先啦。」
我說：「好。」
家長拿出USB，插入手提電腦的插頭。
家長說：「拿，你睇吓啦。」
我說：「睇吓閱讀卷。」
家長打開閱讀卷。
我指著文章第一段第一個空格，
我說：「仔仔，知唔知呢嗰空格要填咩詞性？」
仔仔說：「副詞。」
我說：「唔啱，係形容詞。睇吓寫作卷。」
家長打開寫作卷。
我指著第一段第三行，
我說：「知唔知點解老師評語話你寫得好？」
仔仔說：「唔知。」
我說：「因為合理準確咁運用咗Subjunctive Mood，即虛擬語氣。」
仔仔說：「咩係虛擬語氣？」
我說：「唔知點解都用到，背落去架？」
仔仔說：「......」
家長說：「睇完試卷，你認為佢英文點？」
我說：「背咗唔小嘢，但係好混亂，整體黎講，基本技術係差，要逐步重新建立。」
家長說：「但係6月就期考啦！」
我說：「今日3月11號，你想3個月之內，追番期考合格呀？」
家長說：「梗係啦。」
我說：「冇可能嗰喎。」
家長說：「點解冇可能？」
我說：「仔仔基本技術出現好多問題，要逐個攪。我一個禮拜先見佢一個鐘，講完又要做，做完又要改，改完又要討論。就算仔仔完全配合，要有改變，時間最少都要以年計！」
家長說：「但係佢之前已經補咗兩年英文架啦，仲基本技術有問題？」
我說：「咁嗰兩年冇攪過啲基本技術，基本技術就自然有問題架啦。」
家長說：「咁期考點算？」
我說：「如果唔合格就係失敗，咁就準備面對失敗囉。」
家長說：「咁而家你可以點幫佢？」
我說：「逐步建立基本技術。好啦，夠鐘，你慢慢考慮吓啦。」
.......
另一個我說：「喂！神唔係話佢有能力將不可能變成可能嘅咩？」
我說：「係呀。」
另一個我說：「咁你唔向神叩門？」
我說：「仲叩門？我已經開埋門俾嗰家長入嚟，仲話埋俾家長知，我可以點樣幫仔仔逐步重建基本技術囉！」
另一個我說：「唔叩門就算啦，咁向神求問兩句都得掛？」
我說：「你仲想求啲咩呀？」
另一個我說：「求三個月之後仔仔期考合格囉。」
我說：「仔仔嘅情況，三年就差唔多。」
另一個我說：「你唔得姐，神得呀嘛，求啦。」
我說：「你好想求神幫仔仔用三個月就得到三年嘅成果，係咪呀？」
另一個我說：「梗係啦。」
我說：「咁唔好等三個月啦，即刻去擦神燈，叫燈神出嚟啦。」
發表新回應