「說神話的，就是基督徒❓」
跟神有關係的，才是基督徒。
......
星期四練習羽毛球時，陳sir介紹了一名高小學生跟我學習英文。
16/10/2020（六）12:00 家
家長說：「呢份係佢最近期嘅一篇作文。」
我說：「俾我睇下。」
家長說：「佢已經好俾心機作架啦，但係都唔合格。」
我說：「唔。」
家長說：「之前嗰兩個補習老師都係補補下，就自己話唔補，可能同仔仔唔夾。」
我說：「唔。」
我看看學生。
我說：「篇文好俾心機作？」
學生說：「係呀。」
我說：「篇文諗咗幾耐？」
學生說：「15分鐘。」
我說：「寫咗幾耐？」
學生說：「15分鐘。」
我說：「篇文你作架？」
學生說：「係呀。」
我說：「篇文99%係你作嘅，但係第一句唔係你作嘅。」
學生說：「第一句係老師俾架，叫我哋跟住作。你點知道架？」
我說：「你成篇文都用simple sentence，係得第一句用complex sentence。仲有，我知你點解咁俾心機作，篇文都係肥佬。」
家長說：「點解呀？」
我說：「第一句係主旨句。主旨句寫話 It is important to behave well in public places，即係喺公眾地方行為良好係好重要嘅，係咪？」
學生說：「係呀。」
我說：「咁根據你作嘅下文，public places，公眾地方，即係指邊度？」
學生說：「我冇講過。」
我說：「咁behave well，行為良好，即係要做咩？」
學生說：「我冇講過。」
我說：「important，重要，點解係公眾地方行為良好咁重要？」
學生說：「我冇講過。」
我說：「你篇文第一句係重覆咗句主旨句，但係下文都冇理過個主旨句，好俾心機喺度自說自話，梗係肥佬啦。」
......
另一個我說：「我好俾心機經營我嘅信仰。」
我說：「經咩營呀？」
另一個我說：「我背咗好多經文。」
我說：「唔。」
另一個我說：「我最熟嘅係羅馬書10章9節。我背俾你聽：你若口裡認耶穌是主，心裡信神叫他從死裏復活，就必得救。」
我說：「唔。」
另一個我說：「我仲識背......」
我說：「唔好背住，你上次同耶穌講嘢係幾時？」
另一個我說：「唔知喎。」
我說：「咁你上次收到神提醒你，跟住改正係幾時呀？」
另一個我說：「都唔知喎。」
我說：「咁你上次講起耶穌個名又係幾時呀？」
另一個我說：「呢個我知，係上個禮拜日番教會分享個陣時。」
我說：「你仲未信主，同神冇關係，未係基督徒。」
另一個我說：「你有咩資格咁講呀？我啲嘢你知咩？」
我說：「我1年365日，1日24小時對住你，點會唔知呀？」
另一個我說：「你知啲咩呀？」
我說：「我睇住你把口就係度係咁重覆啲經文，但係之後嘅生活就冇理過神，好俾心機咁係度我行我素，你同神有咩關係呀？」
發表新回應