「如何感恩❓」
認識到手上的一切，我都不配。
......
14/12/2020（一）12:00 家
爸爸說：「糖尿覆診結果出咗啦。」
媽媽說：「結果點呀？」
爸爸說：「一切正常，除咗一樣嘢。」
媽媽說：「咩嘢？唔係糖尿上眼呀嘛？死鬼阿媽糖尿上眼就白內障啦。」
爸爸說：「大吉利是！」
媽媽說：「人哋話糖尿落腳要斬腳嗰喎。」
爸爸說：「醫生話我肥咗好多，要減肥咋。」
媽媽說：「咁你檢點飲食啦。」
爸爸說：「醫生話我飲食冇問題。」
媽媽說：「咁做多啲運動啦。」
爸爸說：「我朝早已經出咗去慢跑架啦。」
我說：「咁唔差在夜晚上埋功樂道行吓後山囉。」
爸爸說：「你得閒陪我去咩？一係就死去學音樂，唔係一食完飯就死埋部琴到，死噤爛噤。」
我說：「我唔得，皮皮得呀嘛。」
媽媽說：「又係喎。」
我說：「你試下問皮皮肯唔肯陪你上山咪得囉。」
爸爸說：「唔駛問啦，出街，皮皮實奉陪到底。」
媽媽說：「老豆，你食飽飯冇嘢做，坐坐吓就上床瞓架啦。你咁樣食飽瞓，遲早瓜柴。」
爸爸說：「皮皮，咁今晚食完飯上山兜個圈啦。」
媽媽說：「嘩，而家成屋人都帶皮皮出街，圍住隻狗轉。朝早就你；下晏就我；夜晚就你老豆。真係陰公。」
我說：「陰咩公呀？」
媽媽說：「我哋努力咗大半世，而家淪落到要隻狗陪。」
爸爸說：「係架啦。」
我說：「淪咩落呀？大把老人家都係喺屋企自己對住四部牆咋。」
媽媽說：「呢啲係極端例子姐。」
我說：「由你腳痛開始，就成日係屋企度睇Youtube，都唔知民情。」
媽媽說：「個個仔都想自己嗰老豆老母好，係你咁鬼衰。」
爸爸說：「係啦，衰到死。」
我說：「我衰得過你兩公婆？你哋唔信耶穌，耶穌都安排我上年年尾買皮皮筒筒番黎陪你哋，耶穌咁愛你哋，你哋都仲話自己淪落。我認為耶穌實在對你兩公婆太好啦，應該安排四部牆俾你哋就差唔多。」
發表新回應