本週反思#208💬

「主恩待我，如何體會❓」

欣然接受。

……

15/10/2021（五）15:40 WhatsApp

視唱練耳課的同班同學傳來短訊。

同學說：「我下禮拜三要請假，上唔到視唱練耳。」

我說：「哦。」

同學說：「你可唔可以幫我用手機錄音，落堂再send番俾我？」

我說：「Zoom有得錄音架。」

同學說：「Zoom錄音淨係聽到電腦附近啲聲，即係聽到阿sir講嘢，但係我想聽埋你哋唱。」

我說：「咁要問吓阿sir錄唔錄得音先喎。」

同學說：「問咗阿sir，阿sir話ok。」

我說：「咁快嘅，咁OK啦。」

……

07/12/2021（二）19:02 WhatsApp

同學說：「我睇日有事要請假，又上唔到視唱練耳。」

我說：「哦。」

同學說：「你可唔可以幫我用手機錄音，落堂再send番俾我？」

我說：「OK。」

……

15/12/2021（三）19:30 香港國際音樂學校

同學說：「我想送份禮物俾你。」

我說：「我？」

同學拿出百佳現金卷。

同學說：「多謝你幫我錄音呀！」

我說：「咁我都多謝你張百佳現金卷。」

……

另一個我說：「做咩收禮物呀你？」

我說：「做咩唔收得禮物呀我？」

另一個我說：「你幫完人，就收人禮物，俾其他人知道點算？」

我說：「我唔講，佢唔講，都冇人知。你都係我而家講你先咋嘛。」

另一個我說：「人哋知道咗，會覺得你喺為咗份禮物先去幫人。」

我說：「你咁講好有問題喎！」

另一個我說：「你而家收咗張百佳現金卷呀！我咁講有咩問題？」

我說：「梗係有問題啦，我一次又一次應承幫佢錄音，幫佢嗰陣佢都冇講過話會送百佳現金卷。」

另一個我說：「你係咪想講話，你幫佢錄音，有百佳現金卷以外嘅動機？」

我說：「唔駛咁複雜，嗰動機就係，主。」

另一個我說：「咁有主咪夠囉，仲收你同學張百佳現金卷？」

我說：「佢感謝送禮，我欣然接受，完全冇問題。又或者…」

另一個我說：「又或者咩呀？」

我說：「又或者係主獎賞我做得好，咁我咪領獎囉。」

另一個我說：「你淨係顧住鄰舍致謝主獎賞，一陣有人背後話你呢個基督徒貪得無厭，我睇你到時仲有咩面目嗰個禮拜喺嗰網頁度寫分享，人言可畏呀！」

我說：「你咁多嘢可畏，咁怕冇面嘅，咪唔好收張百佳現金卷囉，不過轉頭唔好去怨主呀。」

另一個我說：「我會怨主啲咩？」

我說：「怨主虧待你囉。而家主擺明恩待你架啦，係你喺度驚呢驚路，自己虧待自己咋。」