「主百分百支持,你如何回應❓」
立即起錨。
……
13/06/2022(一)07:01 WhatsApp
有陌生人傳來訊息。
她說:「葉sir,我係課程發展部嘅同事。」
我說:「係。」
她說:「大概三年前,你參加課程發展,幫手寫教材嘅。」
我說:「係,三年前。」
她說:「筆酬金終於出咗啦。」
我說:「太好啦。」
她說:「有冇問題?」
我說:「冇。」
她說:「如果冇問題,想麻煩你俾嗰銀行入數戶口俾我?」
我說:「好呀。」
……
13/06/2022(二)10:30 Band房
我說:「我已經Pass咗AMusTCL(聖三一音樂學院樂理文憑考試)啦。」
另一個我說:「知啦。」
我說:「我諗住考LMusTCL(聖三一音樂學院樂理高級文憑考試)。」
另一個我說:「遲啲先算啦。」
我說:「遲到幾時?」
另一個我說:「等你夠料考嗰陣?」
我說:「等到幾時我先夠料?點先至算夠料?」
另一個我說:「終有一日嘅。」
我說:「終有邊一日呀?唉,我自己問老師。」
……
13/06/2022(二)10:34 WhatsApp
我說:「老師,我打算考LMusTCL,想了解一下詳情。」
老師說:「OK。」
我說:「幾多人學最好?」
老師說:「一至兩個。」
我說:「要預備幾耐?」
老師說:「大約40堂,一個禮拜一堂,10個月左右,實際情況要視乎你的音樂能力同埋勤力程度而定。」
我說:「明白。而家出咗6年考試範圍,2021-2022,2023-2024,2025-2026,考邊年好?」
老師說:「2023-2024,呢年考分析鍵盤音樂,鍵盤音樂係咁多種音樂體裁之中最簡單。」
我說:「幾時開始學最好?」
老師說:「盡快。」
我說:「駛唔駛等作曲文憑畢業先開始學?」
老師說:「唔駛等,越早開始學越好。因為考試一年兩次,一次五月,一次十一月。兩年轉一次syllabus,換言之,同一個syllabus,你得四次機會。唔好諗住一次考到,一次考到的成功率係唔夠兩成。」
我說:「收到,早啲試考,唔合格就補鐘再考。」
老師說:「全中。」
…….
另一個我說:「做咩唔交代埋學費同考試費?」
我說:「貴囉。」
另一個我說:「有質素嘅嘢就梗係唔會平架啦。」
我說:「我知呀。」
另一個我說:「咁貴,咁你仲去唔去馬呀?」
我說:「我而家就去同老師約上堂時間,準備報考LMusTCL?」
另一個我說:「難度好高嗰喎,而且仲要駛一大筆,都係睇定啲,睇吓主點睇先再講啦。」
我說:「主百分百支持。」
另一個我說:「主幾時、邊度、點樣表示百分百支持?」
我說:「主今朝07點01分,搵課程發展部嘅同事喺WhatsApp度,call番拖咗我3年嗰條數出嚟,全數資助我考LMusTCL,筆錢夠我上足40堂,失敗加鐘補考添喎。10點34分,仲預備埋老師教我點做,失憶症呀你?」
另一個我說:「哎呀,我記唔起。」
我說:「你今朝嘅嘢都記唔起,主三年前嘅嘢都仲掛喺心上。而家我唔同你嚟嗰失憶症喺度浪費光陰,我要同老師約時間上LMusTCL Theory。」
另一個我說:「約幾時開始上?」
我說:「七月第一個禮拜。」
另一個我說:「咁咪即係兩個禮拜之後,第三學期考完試即刻開始?咁急做乜呀?等一等先啦。」
我說:「主已經表達百分百支持囉喎,仲有邊個要等呀?等你呀?係咁啦,起錨。」
發表新回應