「同主交流是最好的，相信嗎❓」
信就而家。
……
29/06/2022（三）11:00 Band房
同學上來交流音樂。同學打開琴蓋，開始彈奏。
我說：「喂，做乜彈《耶穌愛我》？」
同學說：「我諗住練呢首。」
我說：「唔係，你上個禮拜明明唔係話想練呢首架。」
同學說：「我本來係想練第二首嘅。」
我說：「本來想練邊首？」
同學說：「《晚禱》。」
我上YouTube搜尋一下。
我說：「有好多首《晚禱》喎，邊首先係？」
同學說：「美樂頌192。」
我在YouTube再搜尋一下，《美樂頌192 - 晚禱》，播放音樂。
我說：「係咪呢首？」
同學說：「係呢首，我之前做基督教出版社就係成日聽呢首，好好聽。」
我說：「咁好聽，做乜唔練呢首？」
同學說：「哦，都搵唔到啱我程度嘅琴譜。」
我說：「咁你唔出聲？」
同學說：「我同教會嘅一個帶音樂敬拜嘅弟兄講過，佢話幫我整個譜，點知講咗成三個禮拜紙都冇張。」
我說：「追問佢幾時有囉。」
同學說：「佢嗰個禮拜都話下個禮拜。」
我說：「我幫你搵份譜，好唔好？」
同學說：「而家？」
我說：「你想三個禮拜之後？」
同學說：「咁而家。」
我上網找到一份《美樂頌192 - 晚禱》琴譜。
我說：「份譜有Melody（旋律）同埋Chord Symbols（和弦代號），OK？」
同學說：「唔OK。我唔識解讀Chord Symbols。」
我說：「咁我幫你打份譜，跟住Chord Symbols打個單音Bass Line（低音線）俾你。」
同學說：「而家呀？」
我說：「你想三個禮拜之後呀？」
同學說：「咁而家，唔該晒。」
我打完琴譜，試彈一下。
我說：「原譜有幾個Chord麻麻哋，唔夠tension（張力）。」
同學說：「咁點算呀？」
我說：「我幫你配過啲Chord。」
同學說：「都係而家呀？」
我說：「梗係。」
我修改了某幾個和弦，再試彈一下。
同學說：「好聽過原裝！整咗啲乜？」
我說：「第一個phrase（樂句）整咗條Ascending Bassline（上行低音線），第二個phrase整咗條Chromatic Descending Bassline（半音階下行低音線）。」
同學說：「正。」
我說：「我都覺。」
……
另一個我說：「嘩，你乜都而家嘅？」
我說：「係咩？」
另一個我說：「搵譜又而家、打譜又而家、配弦又而家、試彈又而家，駛乜樣樣都而家呀？陣間先都唔怕啦。」
我說：「點解要陣間先？」
另一個我說：「咁而家可能有其他更好嘅嘢做架嘛。」
我說：「音樂咪夠晒好囉，我想而家。」
另一個我說：「祈禱有時都要陣間先啦，何況係音樂？」
我說：「祈禱更加唔會陣間先，我一諗到嘢同主講就即講。」
另一個我說：「陣間先講都唔怕啦！而家可能有其他更好嘅嘢做呢？」
我說：「唔會，主最好，乜仲有嘢好得過主咩？」
另一個我說：「冇，我基督徒黎架嘛，一定信主係最好啦！」
我說：「既然信主最好，點解你頭先又話連祈禱同主交流下都要陣間先，唔係而家嘅？」
發表新回應